ذیشان ظفر بی بی سی اردو ڈاٹ کام، اسلام آباد

	گزشتہ ماہ پیٹرولیم مصنوعات کی قیمتوں میں دو بار کمی کی گئی

اتوار کو رات گئے تیل اور گیس کی قیمتوں کا تعین کرنے والے ادارے اوگرا سے جاری ہونے والے نوٹیفیکشن کے مطابق پٹرول کی قیمت نو روپے کمی کے بعد ستاون اعشاریہ چھیاسٹھ اور ڈیزل کی قیمت چار روپے کمی کے بعد ستاون اعشاریہ چودہ روپے فی لیٹر مقرر کی گئی ہے۔

اس کے علاوہ مٹی کے تیل میں پانچ روپے کمی ہوئی ہے اور نئی قیمت اکیاون اعشاریہ ستاسی روپے ہو گئی ہے۔

پیڑولیم مصنوعات کی قیمتوں میں رد وبدل کے بعد پیڑول اور ڈیزل کی فی لیٹر قیمت تقریباً برابر ہو گئی ہے۔

پٹرولیم مصنوعات کی نئی قیمتوں کا اطلاق یکم دسمبر سے ہو گا۔ اس سے قبل سولہ اکتوبر کو بھی پٹرول اور ڈیزل کی قیمتیں کم کی گئی تھیں۔ جبکہ تقریباً ایک ماہ کے دوران قیمتوں میں تیسری بار کمی کی گئی ہے۔

پٹرولیم مصنوعات کی قیمتوں میں کمی بین الاقوامی مارکیٹ میں خام تیل کی قمیت میں نمایاں کمی کے بعد کی گئی ہے۔

حکومت کو عوام اور حزب مخالف کی جماعتوں کی طرف سے بھی پٹرولیم مصنوعات میں کمی کے لیے مسلسل دباؤ کا سامنا تھا۔

مبصرین کا کہنا ہے پیٹرولیم مصنوعات کی قیمتوں میں کمی سے افراطِ زر کی شرح میں کمی کے امکانات روشن ہو گئے ہیں۔

پیٹرولیم مصنوعات کی قیمتوں میں حالیہ دنوں میں کی گئی کمی کے بعد صوبائی حکومتوں نے ٹرانسپورٹ کے کرایوں پر نظر ثانی کا عمل شروع کر دیا ہے۔