ذوالفقار علی بی بی سی، اردو ڈاٹ کام ، مظفرآباد

	ہلاک ہونے والوں میں عورتیں اور بچے بھی شامل ہیں

پولیس کا کہنا ہے کہ یہ مسافر جیپ باغ کے ایک قصبے ہیلہ سے دوسرے قصبے فارورڈ کہوٹہ جا رہی تھی کہ رجی کے مقام پر حادثے کا شکار ہوکر گہری کھائی میں گر گئی۔

اس حادثے کے نیتجے میں پولیس کے مطابق دو بچوں اور دو خواتین سمیت نو افراد ہلاک ہوگئے۔ زخمیوں کو نزدیکی ہسپتال میں منتقل کیا گیا ہے۔

پولیس کا کہنا ہے کہ حادثہ جیپ کے ٹائی راڈ ٹوٹ جانے کے باعث پیش آیا ہے۔

کشمیر کے ان زلزلہ زدہ علاقوں میں ٹریفک حادثات معمول بنتے جا رہے ہیں اور حکام اس کی بڑی وجہ سڑکوں کی خراب حالت بتا رہے ہیں۔

آٹھ اکتوبر سن دو ہزار پانچ کے زلزلے میں کشمیر کے اس علاقے کی بیشتر سڑکیں تباہ ہوئی تھیں یا ان کو نقصان پہنچا تھا۔

ان میں بیشتر کو قابل استعمال تو بنایا گیا ہے لیکن یہ نہیں کہا جاسکتا ہے کہ ان کو دوبارہ تعمیر کیا گیا ہے۔ زلزلے کو تین سال ہونے کو ہیں لیکن متاثرہ علاقوں میں سڑکوں کی حالت اب بھی خستہ ہے۔

لوگوں کو سفر کرنے میں مشکلات کا سامنا ہے اور وہ بے یقینی اور خوف کی کیفیت میں سفر کرتے ہیں۔