ہارون رشید بی بی سی اردو ڈاٹ کام، اسلام آباد

	آمنہ مسعود جنجوعہ ڈیفنس آف ہیومن رائٹس تنظیم کی رہنما ہیں

یورپ کے دورے سے پاکستان واپسی پر بی بی سی سے بات کرتے ہوئے آمنہ جنجوعہ نے کہا کہ لاپتہ افراد کے اب تک رہا نہ ہونے کی وجہ اگر سابقہ حکومت تھی تو موجودہ حکومت نے بھی تو کچھ نہیں کیا ہے۔ ’اس حکومت کو سابقہ حکومت کی کوتاہیوں کا ازالہ کرنا ہوگا۔‘

انہوں نے کہا کہ ان کے اس دورے کا مقصد بین الاقوامی سطح پر لاپتہ افراد کے مسئلے کو اُٹھانا تھا۔ انہوں نے یورپی ممالک کا دورہ ایمنسٹی انٹرنیشنل کے تعاون سے کیا ہے۔ انہوں نے ایک ماہ میں لندن ، ناروے ، سویڈن ، اوسلو اور کئی ممالک کا دورہ کیا ہے۔

آمنہ جنجوعہ نے کہا کہ وہ جنیوا بھی گئیں تھیں جہاں انہوں نے ہیومن رائیٹس کونسل کے نویں اجلاس میں شرکت کی۔ انہوں نے مزید کہا کہ لاپتہ افراد کا مسئہ اب بین الاقوامی مسئلہ بن چکا ہے اور جرمنی نے تو لاپتہ افراد کی کنوینشن پر دستخط بھی کئے ہیں۔ جرمنی نے کہا ہے کہ پاکستان بھی اس کنوینشن پر دستخط کرے۔

ان کا مزید کہنا ہے کہ لاپتہ افراد کے لیے جدوجہد کو تین سال ہو گئے ہیں لیکن اب تک ان افراد کے بارے میں کچھ معلوم نہیں ہوسکا ہے۔آمنہ کا کہنا ہے کہ ان کے خاوند پر تین سالوں میں اب تک کچھ ثابت نہیں ہوا ہے تو انہیں رہا کیوں نہیں کیا جا رہا۔

آمنہ جنجوعہ نے یورپی ممالک کے پارلیمانی رہنماؤں سے ملاقات کا مقصد یہ بتایا کہ وہ تمام رہنما پاکستان کے پارلیمانی رہنماؤں سے اپنے طور پر بات کریں تاکہ اس مسئلہ کو جلد از جلد حل کیا جا سکے۔

اس وقت پاکستان میں تقریبا پانچ سو چالیس افراد لاپتہ ہیں لیکن آمنہ جنجوعہ کے مطابق اب تک ایک سو چوالیس لاپتہ افراد اپنے اپنے گھروں کو واپس آچکے ہیں اور چوالیس افراد کے بارے میں معلوم ہوگیا ہے کہ انہیں کہا رکھا گیا ہے۔

واضح رہے کہ گزشتہ دنوں وزیراعظم یوسف رضا گیلانی نے اعلان کیا تھا کہ ان لاپتہ افراد کو جلد رہا کر دیا جائے گا۔