ریاض سہیل بی بی سی اردو ڈاٹ کام، کراچی

	عمارت کی حالت خستہ اور اجاڑ تھی، اس کی بہتری اور بحالی پر کافی پیسے خرچ کیے گئے ہیں:اداکار ارشد محمود

سابق صدر پرویز مشرف کی ہدایت پر سن دوہزار پانچ کو سندھ کے محکمہ سیاحت اور ثفاقت آرٹس اکیڈمی شروع کرنے کے لیے کراچی کی تاریخی عمارت ہندو جِمخانہ معروف اداکار اور صداکار ضیاء محی الدین کے حوالے کر دی تھی۔

صوبائی وزیر سیاحت اور ثقافت سسی پلیجو کا کہنا ہے کہ یہ عمارت ہندو برادری کی ملکیت ہے اور شہر میں ایسی کوئی جگہ نہیں جہاں وہ اپنے تہوار منا سکیں۔

انہوں نے کہا کہ جنرل پرویز مشرف نے زبردستی وہاں سے سامان باہر پھنکوا کر اپنے رشتہ داروں کے کہنے پر یہ عمارت خالی کروا کر ناپا کے حوالے کیا۔ اس کی ابتداہی غلط تھی اور پیپلز پارٹی نے اپوزیشن بھی اس اقدام کی مخالفت کی تھی۔

انہوں نے کہا کہ اس عمارت میں تاریخی نوعیت کے سامان کو بے دردی سے حیدرآباد کے میوزیم میں منتقل کیا گیا جس کی بڑی اہمیت تھی۔

صوبائی وزیر کا کہنا تھا کہ پرویز مشرف کے تعلق کی وجہ سے انتقام لینے کی بات غلط ہے، پیپلز پارٹی انتقام میں یقین نہیں رکھتی ہے۔ اس عمارت کو ہندو کمیونٹی کی سرگرمیوں کے لیے وقف کیا جائے گا۔

شہر کے مرکزی علاقے اور آرٹس کونسل کے سامنے ایم آر کیانی روڈ پر واقع اس عمارت میں ضیا محی الدین نے ’ناپا‘ کی بنیاد رکھی۔ اکیڈمی کا افتتاح بھی سابق صدر نے کیا تھا۔

’ہمارا احتجاج‘  آرٹسٹوں کے پاس وہ طاقت نہیں ہے جو وکیلوں کے پاس ہے۔ ہمارا دل تو بہت دکھے گا اور رنج بھی ہوگا شرافت کے دائرے میں رہتے ہوئے جو مزاحمت کرسکیں گے وہ کریں گے   ارشد محمود

پیپلز پارٹی کی حکومت کے قیام کے بعد صوبائی وزیر سیاحت اور ثقافت سسی پلیجو نے ہندو جِمخانہ کی عمارت ہندو کمیونٹی کے حوالے کرنے کا اعلان کیا اور وزیراعلیٰ سید قائم علی شاہ نے اس کی منظوری دی تھی۔

صوبائی محکمہ سیاحت اور ثقافت کی جانب سے گزشتہ دنوں نیشنل اکیڈمی آف پرفارمنگ آرٹس انتظامیہ کو نوٹس جاری کیا گیا ہے، جس میں انہیں تین ماہ کے اندر عمارت خالی کرنے کی ہدایت کی گئی ہے۔

کراچی کے ہندؤوں کا حق  پیپلز پارٹی کی حکومت کے قیام کے بعد صوبائی وزیر سیاحت اور ثقافت سسی پلیجو نے ہندو جِمخانہ کی عمارت ہندو کمیونٹی کے حوالے کرنے کا اعلان کیا تھا۔

ہندو جِمخانہ کی عمارت انیس سو پچیس میں تعمیر ہوئی، جو مغل طرز تعمیر کا ایک نمونہ ہے۔ قیام پاکستان سے قبل شہر کا ہندو امراء کا طبقہ اس میں سماجی سرگرمیاں منعقد کیا کرتا تھا، اس عمارت کی تعمیر کے لئے سیٹھ رام گوپال نے رقم فراہم کی تھی۔

سابق صدر پرویز مشرف نے اکیڈمی کے افتتاح کے موقع پر کہا تھا کہ اس عمارت کے تاریخی اور ثقافت پس منظر کی وجہ سے اس کا انتخاب کیا گیا ہے۔

نیشنل پرفارمنگ آرٹس اکیڈمی کا کہنا ہے کہ یہ اپنی طرز کا پاکستان میں واحد ادارہ ہے جو گائیکی، اداکاری، ساز اور ڈانس میں تین سال کا ڈپلومہ کورس کراتا ہے تاہم اس کی فیس عام شہری کے پہنچ سے دور ہے جس وجہ سے شہر کی امراء کے بچوں کی اکثریت ہی یہاں داخلہ لیتی ہے۔

مشرف کا تعلق نہیں  جب ارشد محمود سے پوچھا گیا کہ پرویز مشرف کی بیٹی کی ادارے سے مبینہ وابستگی کی وجہ سے یہ عمارت ان سے خالی کرائی جارہی تو انہوں نے جذباتی انداز میں کہا کہ ان کی بیٹی کا اس سے کوئی تعلق نہیں ہے۔ انہوں نے کہا کہ انہیں سمجھ نہیں آتا کہ لوگ یہ تاثر کیوں لیتے ہیں وہ اس کی سرپرستی کرتی ہیں

رواں سال جنوری میں اکیڈمی سے پہلا بیچ فارغ تحصیل ہوچکا ہے، جبکہ دیگر دو سو لوگ زیر تربیت ہیں۔

اکیڈمی کے ڈائریکٹر پروگرامز اور نامور اداکار ارشد محمود کا کہنا ہے کہ انہوں نے معاہدے کی کوئی خلاف ورزی نہیں کی ہے اور نہ ہی کوئی غیر قانونی تعمیر کی گئی ہے۔

ان کا کہنا تھا کہ ان کے اس عمارت میں منتقل ہونے سے پہلے ہی اس میں اوپن تھیٹر موجود تھا۔ انہوں نے کہا اسی اراضی میں تعمیر کی گئی ہے اور تھیٹر ہی بنایا ہے کوئی بورڈنگ ہاؤس یا پلازہ نہیں بنایا۔

ارشد محمود کا کہنا ہے کہ ان کے آنے سے قبل عمارت کی حالت خستہ اور اجاڑ تھی، بارش میں چھت ٹپکتی تھی اس کی بہتری اور بحالی پر کافی پیسے خرچ کیے گئے ہیں۔

جب ان سے یہ پوچھا گیا کہ کیا وہ سمجھتے ہیں کہ پرویز مشرف کی بیٹی کی ادارے سے مبینہ وابستگی کی وجہ سے یہ عمارت ان سے خالی کرائی جارہی تو انہوں نے جذباتی انداز میں کہا کہ ان کی بیٹی کا اس سے کوئی تعلق نہیں ہے۔ انہوں نے کہا کہ انہیں سمجھ نہیں آتا کہ لوگ یہ تاثر کیوں لیتے ہیں وہ اس کی سرپرستی کرتی ہیں۔

ارشد محمود نے کسی احتجاج سے انکار کیا اور کہا کہ آرٹسٹوں کے پاس وہ طاقت نہیں ہے جو وکیلوں کے پاس ہے۔ اننہوں نے کہا کہ ان کا دل تو بہت دکھے گا اور رنج بھی ہوگا شرافت کے دائرے میں رہتے ہوئے جو مزاحمت کرسکیں گے وہ کریں گے۔