عباد الحق بی بی سی اردو ڈاٹ کام، لاہور

	اسلم کو یہ امید ہے کہ وفاقی تحقیقاتی ادارے کو ایجنٹ کے خلاف جو درخواست دی ہے اس پر کارروائی ہونے سے ان کو رقم واپس مل جائے گی

یہ الفاظ بیس سالہ اس پاکستانی نوجوان قاسم علی کے ہیں جو ترکی سے غیر قانونی طور پر سرحد پار کرکے یونان داخل ہونا چاہتا تھا۔قاسم ان تین سو انیس پاکستانیوں میں شامل ہے جنہیں ترکی جیل سے رہائی ملنے کے بعد پاکستان واپس بھیج دیا گیا۔ قاسم اب چلنے پھرنے سے قاصر ہے۔

کس کو کہاں تلاش کریں  ہم نے اپنے رشتہ داروں سے ادھار لے کر یہ رقم ایجنٹ کو ادا کی تھی۔ میں نے یہ سوچا تھا کہ گھر کے حالات بھی بہتر ہوجائیں گے۔ ایجنٹ نے بڑے سبز باغ دکھائے اور زبانی یقین دہانی بھی کرائی تھی لیکن اب وہ غائب ہے اس کو کہاں تلاش کریں   اسلم

ان لوگوں کی کمی نہیں ہے جو سرحد پارکرتے ہوئےگرفتار ہوتے ہیں اور بعد ازاں انہیں بے دخل کرتے ہوئے واپس بھیج دیا جاتا ہے۔ یہ لوگ ایجنٹوں سے اپنی رقوم کی واپسی کے لیے وفاقی تحقیقاتی ادارے میں درخواستیں دے کر متعلقہ دفاتر کے چکر لگاتے نظر آتے ہیں۔

پنجاب کے ضلع گوجرانوالہ کے ایگ گاؤں چک نظام کا قاسم بھی ان نوجوانوں میں سے ایک ہے جو زورگار کے لیے بیرون جا کر اپنی خوابوں کی تکمیل چاہتا تھا اور اسی مقصد کے لیے اس نے ایک ایجنٹ کوبیرون ملک جانے کے لیے پانچ لاکھ روپے کی رقم ادا کی ہے۔

	قاسم کے والد اسلم

قاسم کا کہنا ہے کہ اس کا بعض لوگوں سے رابط ہوا اور انہیں کے ذریعے وہ اس ایجنٹ تک پہنچا۔اس کے بقول ایجنٹ نے اسے بڑے خواب دکھائے اور یقین دلایا کہ وہ بحفاظت یونان پہنچ جائے گا۔

قاسم کے بقول ترکی کی جیل کو پاکستانی دوزخ کہتے ہیں اور غیر قانونی طور پر سرحد پار کرنے کی کوشش میں لوگ بھوک اور پیاس کی وجہ سے مرتے ہیں۔ وہاں لاشیں پڑی رہتی ہیں اور کسی کو کوئی پرواہ نہیں ہوتی۔

یورپ جانے کا خواب دیکھنے قاسم کا اب کہنا ہے کہ لاکھوں روپے دیکر غیرقانونی طور سرحد پار کرنے سے بہتر ہے اسی رقم سے ملک کے اندر کوئی کام شروع کیا جائے۔

قاسم کے ستر سالہ والد اسلم کا کہنا ہے کہ انہوں نے اپنے رشتہ داروں سے ادھار لے کر یہ رقم ایجنٹ کو ادا کی تھی۔ ان کے بقول انہوں نے یہ سوچا تھا کہ گھر کے حالات بھی بہتر ہوجائیں گے۔ ’ایجنٹ نے بڑے سبز باغ دکھائے اور زبانی یقین دہانی بھی کرائی تھی لیکن اب وہ غائب ہے اس کو کہاں تلاش کریں۔‘

پاکستانیوں کی دوزخ  ترکی کی جیل کو پاکستانی دوزخ کہتے ہیں اور غیر قانونی طور پر سرحد پار کرنے کی کوشش میں لوگ بھوک اور پیاس کی وجہ سے مرتے ہیں۔ وہاں لاشیں پڑی رہتی ہیں اور کسی کو کوئی پرواہ نہیں ہوتی   قاسم علی

قاسم کا بڑا بھائی ناصر جو یونان میں ہوتا ہے اور ان دنوں چھیٹوں پر گھر میں آیا ہوا ہے۔ اس کا کہنا ہے کہ وہ انیس سال کی عمر میں ایک ایجنٹ کے ذریعے یونان گیا تھا اور اس غیرقانونی طور پر سرحد پار کرنے میں جن دشواریوں کا سامنا کرنا پڑا تھا اس کے بعد یہ فیصلہ کیا تھا کہ کسی بھی عزیز کو اس طرح بیرون آنے سے روکے گا۔

جہاں قاسم کے ستر سالہ والد اسلم کو اس بات کی خوشی ہے کہ ان کے بیٹے کی جان بچ گئی ہے وہاں وہ اس قرض کی رقم کی واپسی کے لیے بھی پریشان ہے جو انہوں نے اپنے بیٹے کو بیرون ملک بھجینے کے لیے اپنے رشتہ داروں سے ادھار لی تھی اور اب انہیں اپنے بیٹے کے علاج کے لیے بھی رقم چاہیے۔

اسلم کو یہ امید ہے کہ وفاقی تحقیقاتی ادارے کو ایجنٹ کے خلاف جو درخواست دی ہے اس پر کارروائی ہونے سے ان کو رقم واپس مل جائے گی۔

قاسم نہ تو پہلا اور نہ ہی ایسا آخری پاکستانی ہے جو ایک سنہرے مستقبل کے خواب کی تعبیر کے لیے انسانی اسمگلروں کے چال میں پھنس کر اپنی مالی دشواری کو کم کرنے کی بجائے اس میں اضافے کا باعث بن جاتے ہیں۔