ارمان صابر بی بی سی اردو ڈاٹ کام، کراچی

	تیل کراچی میں اتارا جاتا ہے اور پھر افغانستان لے جایا جاتا ہے

کراچی کی بندرگاہ کے قریب ماری پور اور شیریں جناح کالونی کے علاقوں میں ٹرک اڈے قائم ہیں جہاں سے پٹرول اور ڈیزل کی بڑی مقدار ٹرکوں کے ذریعے کراچی اور ملک کے دیگر حصوں میں لے جائی جاتی ہے۔ ان ٹرک اڈے پر حال ہی میں نامعلوم افراد کی جانب سے پرچیاں تقسیم کی گئی ہیں جن میں ٹرک مالکان اور ٹھیکیداروں کو متنبیہ کیا گیا ہے کہ وہ افغانستان کے لئے تیل کی رسد بند کردیں کیونکہ اس طرح وہ امریکی فوج کی مدد کر رہے ہیں۔

کراچی آئل ٹینکرز کنٹریکٹر ایسوسی ایشن کے رہنماء گل محمد آفریدی نے بی بی سی کو بتایا کہ اس طرح کی پرچیاں رواں ماہ تقسیم کی گئیں ہیں جبکہ اسی قسم کی پرچیاں تقریباً دو ماہ قبل بھی بانٹی گئیں تھیں۔

انہوں نے کہا کہ ان پرچیوں پر دھمکی آمیز تحریر درج تھی جس کے مطابق آئل ٹینکروں کے مالکان اور ٹھیکداروں کو متنبہ کیا گیا ہے کہ اگر انہوں نے تیل کی رسد افغانستان کے علاقوں میں امریکی فوجی ٹھکانوں تک جاری رکھی تو ایسے افراد نتائج کا سامنا کرنے کے لئے تیار رہیں۔ ان کے بقول یہ کارروائی ٹرک مالکان اور ٹھیکیداروں میں خوف پھیلانے کے لئے کی گئی ہے۔

گل محمد آفریدی نے کہا کہ افغانستان تک تیل کی رسد ان کی ایسوسی ایشن کے تمام ممبران تو نہیں کر رہے لیکن ہاں چند ممبران ضرور کر رہے ہیں لیکن ان پرچیوں سے اب تک کسی کو پریشانی کا سامنا نہیں ہوا ہے اور نہ ہی کسی ممبر کو انفرادی طور پر دھمکی ملی ہے۔

	آئل ٹینکر مالکان کے اکثر مرکزی دفاتر کراچی میں ہیں

ان کا کہنا ہے کہ جو ممبران افغانستان کے علاقوں میں تیل کی رسد پہنچا رہے ہیں اگر ان میں سے کوئی ایسوسی ایشن سے مدد کی درخواست کرے گا تو پھر اس معاملے پر ایسوسی ایشن کا اجلاس بلا کر غور کیا جائے گا۔

یہ معلوم نہیں ہوسکا ہے کہ اس قسم کی پرچیاں کس تنظیم کی جانب سے تقسیم کی گئیں ہیں اور کن افراد نے تقسیم کی ہیں۔

دوسری جانب پولیس حکام سے رابطہ کرنے پر انہوں نے کہا کہ ان کے علم میں اس طرح کی کوئی بات نہیں لائی گئی ہے، اگر اس قسم کی کوئی بات سامنے آئے گی تو پولیس اس معاملے کی چھان بین کرے گی۔