آصف فاروقی بی بی سی اردو ڈاٹ کام، اسلام آباد۔

	کل بارہ پاکستانی گرفتار کئے گئے تھے جن میں سے تین کو شواہد نہ ہونے کی وجہ سے رہا کر دیا گیا تھا

منگل کوسینیٹ میں ایک توجہ دلاؤ نوٹس کا جواب دیتے ہوئے وزیر خارجہ نے کہا کہ اس کارروائی میں کل بارہ پاکستانی گرفتار کئے گئے تھے جن میں سے تین کو شواہد نہ ہونے کی وجہ سے رہا کر دیا گیا تھا تاہم باقی نو کے قبضے سے سپین کے حکام نے بم دھماکوں میں استعمال ہونے والا مواد برآمد کیا تھا۔ ان پاکستانیوں سے تفتیش کے دوران یہ بھی پتہ چلا ہے کہ یہ لوگ سپین اور یورپ کے دیگر ممالک میں دہشت گردی کرنے کی منصوبہ بندی کر رہے تھے۔

وزیر خارجہ نے کہا کہ ان کی گرفتاری کی اطلاع ملتے ہی سپین میں پاکستانی سفارتخانے نے ان زیر تفتیش شہریوں سے ملاقات کی تھی اور ان کا ان کے گھر والوں سے رابطہ بھی کروایا گیا تھا۔ انہوں نے ایوان کو یہ بھی بتایا کہ دہشت گردی کے الزامات کا سامنا کرنے والے ان تمام پاکستانیوں کو وکلاء کی سہولت بھی فراہم کی گئی ہے۔

عدالتی کارروائی کے بغیرجیل  ان بے گناہ پاکستانیوں کو بغیر کسی عدالتی کارروائی کے جیل میں رکھا گیا ہے اور ان کا کسی سے رابطہ نہیں ہونے دیا جا رہا ہے   سینیٹر انور بھنڈر

سینیٹر انور بھنڈر نے یہ معاملہ سینیٹ میں زیر بحث لاتے ہوئے کہا کہ ان بے گناہ پاکستانیوں کو بغیر کسی عدالتی کارروائی کے جیل میں رکھا گیا ہے اور ان کا کسی سے رابطہ نہیں ہونے دیا جا رہا ہے۔