اسد علی بی بی سی اردو ڈاٹ کام، لندن

	ایم ڈی طاہر کو رجوع کرنے والوں میں پسماندہ دیہات سے لے کر امریکہ کے رہائشی، ان پڑھ سے لے کر اعلیٰ تعلیم یافتہ لوگ اور بے اختیار پاکستانیوں سے لے کر ریٹائرڈ جج اور اعلیٰ عہدیدار شامل تھے

ایم ڈی طاہر انتقال کر گئے

ایم ڈی طاہر، توہین عدالت کی سزا

ان کا ہتھیار تھا آئین میں درج بنیادی حقوق کے تحت درخواستیں دائر کرنا۔ ان کی میز پر قانون کی کتابوں کے ساتھ ہمیشہ دو تصویریں نظر آئیں۔ یہ تصویریں بغیر کپڑوں کے اور بکھرے بالوں والے ایک باریش شخص کی تھیں، جن کے بارے میں وہ بڑی عقیدت سے بتاتے کہ ’یہ میرے بابا، مرشد پاک ہیں‘۔ ان کے دفتر میں کتابوں کی الماریوں پر بھی ایسے ہی کئی بزرگوں کی تصاویر تھیں جو اب ایک الگ کمرے میں منتقل ہو چکی تھیں جسے وہ ’درویش خانہ‘ کہتے تھے۔

غریب کا مقدمہ  اگر حکام سرکاری خرچ پر علاج کے لیے بیرون ملک جا سکتے ہیں تو غریب پاکستانی کیوں نہیں جا سکتا   ایم ڈی طاہر

عدالتوں میں کئی بار ایم ڈی طاہر کی بات سن لی گئی، بہت سے معاملات التواء میں پڑ گئے اور بعض اوقات انہیں جھاڑا بھی گیا۔ ان پر یہ الزام بھی لگا کہ وہ بغیر تیاری کے کسی بھی موضوع پر درخواست دائر کر دیتے ہیں جس سے معاملہ بگڑ جاتا ہے۔ لیکن ان کی درخواستوں میں کمی نہیں آئی، وقت کے ساتھ ساتھ ان کو رجوع کرنے والوں کی تعداد بڑھتی گئی اور اتنے عرصے میں صحافی بھی ان سے تنگ نہیں آئے۔ بلکہ ابھی مارچ کے آخری ہفتے میں انہیں بنگلہ دیش سے وہاں پھنسے ہوئے بہاریوں کی پاکستان منتقلی کے لیے کام کرنے والے ایک شخص نے فون پر اپنے کیس کے بارے میں پوچھا۔ انہیں بھی ایم ڈی طاہر سے امید تھی کہ شاید کچھ کروا دیں۔

ایم ڈی طاہر کو پاکستان اور بیرن ملک سے ہر روز اوسطاً دس بارہ سے لے کر تیس تک خط موصول ہوتے تھے۔ ان کے پاس خطوط کا ایک انبار تھا جو مختلف تھیلوں میں محفوظ ہیں۔ وہ ان خطوط کو ’لوگوں کی کہانی لوگوں کی زبانی‘ کے عنوان سے کتابی صورت دینے کا ارادہ کرنے کے بعد اب اِن کی موضوع وار چھانٹی کے لیے کسی رضاکار کے منتظر تھے۔

اخلاقی جرات  ایم ڈی طاہر نے مجھے ایک بار امریکہ سے آیا ہوا ایک خط دکھایا جس میں حکومت کی پالیسی کو چیلنج کیا گیا تھا اور کچھ اصلاحات تجویز کی گئی تھیں۔ خط کی زبان بھی اچھی تھی اور مضمون محنت سے تیار کیا گیا تھا لیکن خط لکھنے والے نے اپنا نام نہیں لکھا۔ ایم ڈی طاہر نے کہا کہ بہت سے لوگ ہیں جو خود کچھ نہیں کر سکتے لیکن ’ان میں اتنی اخلاقی جرات تو ہونی چاہیے کہ خط کے نیچے اپنا نام ہی لکھ دیں‘۔

ایم ڈی طاہر نے جیلوں کی اصلاح کے لیے تن تنہا بہت کام کیا۔ ہائی کورٹ کے سابق جج اور موجودہ اٹارنی جنرل جسٹس(ر) ملک قیوم نے ایک رٹ پٹیشن کی درخواست کے جواب میں ایم ڈی طاہر کو پنجاب کی تمام جیلوں کے معائنہ کا اختیار دیا تھا۔ کئی ہفتوں کی محنت کے بعد تیار ہونے والی سینکڑوں صفحات پر مشتمل ایم ڈی طاہر کی رپورٹ کو کافی سراہا گیا اور اس کے نتیجے میں کچھ قیدیوں کو ریلیف بھی ملا۔

سیدہ مریم  کرسی کے پیچھے ایک بنچ پر اکثر چار پانچ سال کی نابینا لڑکی سیدہ مریم بھی موجود ہوتی تھی جس کے والد قریب ہی ایک کرسی پر بیٹھے رہتے تھے۔ بینائی کی وجہ سے بچی کی دوسری حسیات تیز ہو چکی تھیں اور وہ بنچ پر بغیر گرے شرارتیں کرتی رہتی تھی۔ ایم ڈی طاہر نے ہائی کورٹ سے استدعا کی ہوئی تھی کہ سرکاری پر خرچ مریم کا علاج کروایا جائے تاکہ اس کی بینائی واپس آ جائے۔

ایم ڈی طاہر نے ہمیشہ سے بلا ناغہ ہفتے میں دو یا تین روز درویشوں سے ملاقاتوں اور ان کے مزاروں پر حاضری کے لیے وقف کر رکھے تھے۔ اس کے لیے وہ سینکڑوں میل کا سفر کرتے اور کبھی کبھار سندھ تک بھی جاتے۔ ان کے پاس تقریباً پینتیس سال پرانی ایک گاڑی تھی جس پر وہ ایک بار کسی بزرگ کے ساتھ بیٹھے تھے۔ انہوں نے وہ گاڑی خرید لی۔ اس کے بعد مالی آسودگی کے باوجود انہوں نے گاڑی نہیں بدلی بلکہ ان کے ڈرائیور کا کہنا تھا کہ جتنا خرچہ اس گاڑی پر ہو چکا ہے اتنے میں پیجارو آ سکتی تھی۔

ان کے مرشد کا مزار ہیڈ مرالہ میں ہے۔ ایک بار استفسار پر انہوں نے بتایا کہ ان کے مرشد نے کئی سال زُہد کیا اور مٹی اور ریت کھا کر گزارا کیا۔ انہوں نے کہا کہ ان کے مرشد کو دیکھنے کے لیے سینکڑوں لوگ آتے تھے اور ان کے پاس بیٹھ کر سکون پاتے تھے۔ ایم ڈی طاہر خود بھی وہاں جا کر سارا سارا دِن بیٹھتے۔
انہوں نے کہا کہ درویش میں تین باتیں ہوتی ہیں۔ وہ کسی سے کچھ لیتا نہیں، اپنا آپ ظاہر نہیں کرتا بلکہ لوگ اسے پہچانتے ہیں اور اس کے پاس سکون ملتا ہے۔ انہوں نے کہا کہ ان کے بزرگ کا پیغام تھا ’کہ کسی کا دِل نہ دکھاؤ اس سے آسمان کے کنگرے ہل جاتے ہیں‘۔