عباس نقوی کراچی

	جواد بیک وقت میڈیم پیسر بولر اور اوپنر بیٹسمین تھے

اسلم خان کا بڑا بیٹا جواد پچھلے ہی ہفتے ڈینگی وائرس کا شکار بنا اور ڈاکٹروں کی کوششوں کے باوجود فوت ہوگیا۔ بیس سالہ جواد کرکٹ کے مقامی حلقوں میں شہر کراچی کے ایک اچھے کرکٹر سمجھے جاتے تھے۔

انہوں نے دو برس انڈر 19 کرکٹ کھیلی اورگزشتہ برس کراچی کے تمام سات زونز کی ٹیموں کے درمیان ہونے والے ٹورنامنٹ کی فتح اس ٹیم کے حصے میں آئی تھی جس کے وہ کپتان تھے۔

	وہ آئندہ دو برسوں میں قومی کرکٹ ٹیم میں شامل ہو جاتا

اسلم خان کا کہنا ہے کہ اُنہیں شہر میں ڈینگی وائرس پھیلنےکا علم اُس وقت ہوا
جب خود ان کا بیٹا اس بیماری کا شکار ہوا۔ وہ بتاتے ہیں کہ بیماری کی چوتھی رات جواد کی حالت غیر ہوگئی اور وہ تمام وقت قے کرتا رہا اور آخری قے میں خون آگیا۔

کراچی سٹی کرکٹ اکیڈمی (کے سی سی اے) کے دیگر کھلاڑیوں اور جواد میں ایک نمایاں فرق یہ تھا کہ وہ بیک وقت میڈیم پیسر بولر اور اوپنر بیٹسمین تھا۔

عبدالحامد اس وقت سے جواد کی کوچنگ کر رہے ہیں جب وہ انڈر 15 کھیلنے آیا تھا۔ اُن کا کہنا ہے کہ کم عمر ہونے کے باوجود جواد کو سینئر ڈسٹرکٹ ٹیم میں کھلایا گیا تھا۔ان کا کہنا ہے جواد کے کھیل کو دیکھ کر یہ اندازہ کیا جاسکتا تھا کہ وہ آئندہ دو برسوں میں قومی کرکٹ ٹیم میں شامل ہو جاتا۔

	وہ بیٹا جسے قومی کرکٹ ٹیم میں کھیلتا دیکھنے کی خواہش تھی، اس کی موت پر تعزیت وصول کرنا پڑی

محکمہ صحت حکومت سندھ کے مطابق شہر میں ڈینگی بخار وباء کی صورت اختیار کرتا جا رہا ہے جس سے یکم اگست سے اب تک چھ سو چھیاسی افراد متاثر ہوکر مختلف ہسپتالوں میں داخل ہوئے ہیں۔

اُن کا کہنا تھا کہ امریکہ سمیت کسی ملک میں اس بیماری سے بچاؤ کی ویکسینیشن نہیں بنائی جاسکی ہے اور اس بیماری سے بچاؤ کا واحد طریقہ احتیاط ہے۔ ڈینگی ایک مخصوص مچھر کے کاٹنے سے ہوتا ہے جس کی افزائش صاف پانی میں ہوتی ہے، جو عام طور پر گھریلو استعمال کے لیے جمع کیا جاتا ہے۔