عزیزاللہ خان بی بی سی اردو ڈاٹ کام، کوئٹہ

تربت کے علاقے گوکدان سے مقامی لوگوں نے بتایا ہے کہ ایک غیر سرکاری تنظیم سیلاب سے متاثرہ افراد میں خوراک تقسیم کر رہی تھی جس پر پولیس اور انسداد دہشت گردی کی فورس نے لوگوں پر لاٹھی چارج کیا اور آنسو گیس کے گولے پھینکے۔ انہوں نے الزام عائد کیا ہے کہ پولیس نے فائرنگ بھی کی اور کچھ اہلکار گھروں میں گھس گئے تھے۔ اس کشیدگی کے دوران پانچ افراد کے معمولی زخمی ہونے کی اطلاعات ہیں ۔

اس بارے میں تربت میں پولیس حکام نے بتایا کہ خوراک کی تقسیم شام گئے تک جاری تھی اور غیر سرکاری تنظیم باقی امدادی سامان دوسرے روز تقسیم کرنا چاہتی تھی لیکن لوگوں نے ہلڑ بازی شروع کر دی جس پر پولیس نے لوگوں کو منتشر کیا ہے۔

پولیس کے مطابق اس واقعہ میں کوئی زخمی نہیں ہوا ہے اور نہ ہی کوئی فائرنگ کی گئی ہے۔

بلوچستان میں سیلاب سے متاثرہ علاقوں میں تاحال باقاعدہ امدادی سامان نہیں پہنچایا جا رہا اور خاص طور پر رمضان کے مہینے میں متاثرین شدید مشکلات کا شکار ہیں۔ تربت، گندھاوا، نال، جھل مگسی اور دیگر علاقوں سے لوگوں نے بتایا ہے کہ انہیں خوراک میسر نہیں ہے اور اب تک بڑی تعداد میں لوگ کھلے آسمان تلے بے آسرا پڑے ہیں۔