عزیزاللہ خان بی بی سی اردو ڈاٹ کام، کوئٹہ

	فرنٹیئر کور نے بلیدہ کے پہاڑی علاقوں میں کارروائی کی ہے

اس کارروائی کے دوران قریباً سترہ اغوا کنندگان گرفتار بھی کر لیےگئے ہیں۔

پولیس اہلکاروں نے بتایا ہے کہ یہ کارروائی فرنٹیئر کور نے بلیدہ کے پہاڑی علاقوں میں کی ہے۔ اس کارروائی میں فائرنگ کے دوران ایک شخص ہلاک اور ایک کے زخمی ہونے کی اطلاع ہے لیکن اس کی تصدیق نہیں ہو سکی۔

فرنٹیئر کور کے اہلکاروں نے گاڑیاں اور اسلحہ بھی برآمد کر لیا ہے۔فرنٹیئر کور کے حکام سے رابطہ نہیں ہو سکا ہے تاہم تربت سے یہ اطلاعات موصول ہوئی ہیں کہ گرفتار افراد کو تربت لایا جا رہا ہے ۔

گزشتہ روز ایران کے سرحدی صوبہ سیستان بلوچستان میں نامعلوم مسلح افراد چاہ بہار کے قریب بڑی تعداد میں گاڑیوں کی تلاشی لینے کے بعد ایرانی باشندوں کو اغواء کر کے پاک ایران سرحد کی جانب فرار ہو گئے تھے۔

اطلاعات کے مطابق گزشتہ روز مسلح افراد کی کارروائی کافی دیر تک جاری رہی اور اس دوران انہوں نے پانچ گاڑیوں کو آگ بھی لگا دی تھی۔

سرحدی علاقوں سے موصول ہونے والی اطلاعات کے مطابق اس کارروائی کے پیچھے جند اللہ نامی تنظیم کا نام لیا جا رہا ہے ۔ اس تنظیم کا نام پاک ایران سرحد کے قریب پیش آنے والے پہلے واقعات میں بھی لیا جاتا رہا ہے۔ تاحال اس تنظیم کے کسی اہلکار نے اس واقعہ کی زمہ داری قبول نہیں کی ہے۔