رہنما ہوش کے ناخن لیں: فاروق ستار

مرکز اور سندھ میں حکومت کی اتحادی جماعت متحدہ قومی موومنٹ نے غیر معینہ مدت تک اپنے تمام تنظیمی سیکٹر اور یونٹ بند کرنے کا اعلان کیا ہے اور کہا کہ کراچی میں نسلی فسادات کرانے کی کوشش کی جارہی ہے۔

متحدہ قومی موومنٹ کے پارلیمانی رہنما ڈاکٹر فاروق ستار نے یہ اعلان آج رات کراچی میں متحدہ کے مرکز نائین زیرو پر ایک پریس کانفرنس میں کیا ہے۔

ان کا کہنا تھا کہ ایم کیو ایم قومی جماعت بننے کے لیے رواں دواں ہے، چند ماہ سے اس کی مقبولیت روکنے کی کوشش کی جارہی ہے۔
ڈاکٹر فاروق ستار کا کہنا تھا کہ متحدہ کی ریلی پرامن تھی جو سازش کا نشانہ بن گئی، معصوم لوگوں پر حملے کیے گئے اور ریلی کی آڑ میں شہر میں دہشت گردی کی گئی۔

ڈاکٹر فاروق ستار کا کہنا تھا کہ ماضی کی طرح لسانی فسادات کرنے کی کوشش کی گی، اے این پی کے رہنما جلتی پر تیل چھڑکنے کی کوشش نہ کریں اور اسفند یار علی اور دیگر رہنما ہوش کے ناخن لیں۔

انہوں نے الزام عائد کیا کہ جماعت اسلامی، عوامی نیشنل پارٹی، پاکستان پیپلز پارٹی اور مسلم لیگ ن عوام کو گھمراہ کر رہی ہیں
متحدہ قومی موومنٹ کی پالیسی تحمل و برداشت ہے۔

پریس کانفرنس میں بتایا گیا کہ متحدہ کے سات سے زائد دفاتر پر حملے اور نذر آتش کیا گیا ہے اور سندھ بھر سے بیس سے زائد کارکن لاپتہ ہیں۔

انہوں نے مطالبہ کیا کہ حملوں میں ملوث ملزمان کو گرفتار کیا جائے اور ان کے ارکان کو بازیاب کیا جائے۔