اعجاز مہر بی بی سی اردو ڈاٹ کام، اسلام آباد

	کراچی میں پیدا ہونے والی ماریہ متین آٹھ برس قبل امریکہ چلے گئی تھیں

انہوں نے کہا کہ اٹھائیس اگست کو چین میں ہونے والے اس روایتی تقریب میں امریکہ کے شہر ہیوسٹن کی رہائشی اور پاکستانی نژاد امریکی شہریت رکھنے والی بائیس سالہ ماریہ متین بطور پاکستانی نہیں بلکہ انفرادی طور پر شریک ہوئیں تھیں۔

وزیر نے کہا کہ اس طرح کے مقابلوں میں شرکت کی نہ اسلام اجازت دیتا ہے اور نہ پاکستان کی ثقافت۔

ماریہ متین جو کراچی میں پیدا ہوئیں اور اطلاعات کے مطابق آٹھ برس قبل امریکہ گئیں انہوں نے وہاں کی شہریت حاصل کرلی ہے۔ وہ ’مس بکنی‘ کا مقابلہ تو نہیں جیت سکیں تھیں البتہ پاکستان کی نمائندہ کہلوانے کی وجہ سے اس مقابلے میں شریک لڑکیوں میں سب سے زیادہ میڈیا کی توجہ کا مرکز رہیں۔

ان کے سب سے زیادہ انٹرویوز ہونے اور تصویریں بنائی جانے پر ’مس بکنی‘ کے منتظمین نے انہیں ’مس میڈیا‘ کا اعزاز دیا تھا۔

وزیر نے کہا کہ ماریہ متین پاکستان کی نمائندہ نہیں اور نہ ہی انہیں حکومت نے بھیجا تھا۔ ان کے مطابق یہ ان کا ذاتی عمل ہے اور حکومت کا اس سے کوئی تعلق نہیں ہے۔

جب وزیر سے پوچھا کہ گزشتہ دنوں ایک پاکستانی نژاد غیر ملکی شہریت رکھنے والی خاتون جسے امریکی خلائی ادارے نے خلا میں بھیجنے کے لیے منتخب کیا ہے اس پر تو پاکستان نے فخر محسوس کرتے ہوئے کہا کہ وہ پہلی پاکستانی ہیں لیکن ’مس بکنی‘ کے مقابلے میں شرکت کرنے والی پہلی پاکستان نژاد غیر ملکی خاتون سے وہ لاتعلقی کیوں ظاہر کر رہے ہیں ؟ تو وزیر نے کہا کہ خلا میں جانا اور ’مس بکنی‘ کے مقابلے شرکت کرنا علیحدہ علیحدہ معاملات ہیں۔

ان کے مطابق اسلام عریانی کے خلاف ہے اور پاکستان کی ثقافت اور ماحول اُسے برا سمجھتا ہے۔

خبر رساں ادارے رائٹرز نے وزارت ثقافت کے ایک افسر عبدالحفیظ چودھری کے حوالے کہا ہے کہ انہوں نے واشنگٹن اور بیجنگ میں قائم پاکستانی سفارتخانوں سے کہا ہے کہ وہ اس بارے میں معلومات حاصل کریں کہ ماریہ متین بطور نمائندہ پاکستان اس مقابلے میں کیسے شریک ہوئیں۔

لیکن اس بارے میں جب وزیر سے دریافت کیا تو انہوں نے کہا کہ حکومت نے اپنے سفارتخانوں سے کوئی کوئی رابطہ نہیں کیا اور نہ ہی اس کی ضرورت ہے۔