بلوچستان: ایرانی سرحدی محافظ گرفتار

پاکستانی شہری کی ہلاکت کے بعد ایف سی کے اہلکاروں نے ایرانی سرحدی محافظوں کو حراست میں لیا

پاکستان کے صوبہ بلوچستان میں ایرانی سرحد کے قریب پاکستانی سکیورٹی فورسز نے غیر قانونی طور پر پاکستان میں داخل ہونے والے ایرانی سرحد فورس کے تین اہلکاروں کو حراست میں لے لیا ہے۔

ایرانی سرحدی فورس کے ہاتھوں ایک پاکستانی کی ہلاکت پر ماشکیل میں لوگوں نے شدید احتجاج کیا ہے۔

کوئٹہ سے بی بی سی کے نامہ نگار ایوب ترین مطابق ایرانی سرحد سے متصل بلوچستان کے علاقے ماشکیل میں اتوار کے روز ایرانی سرحدی فورس کی ایک گاڑی غیر قانونی طور پر سرحد عبور کرتے ہوئے تین کلومیٹر تک پاکستانی حدود میں داخل ہوئی۔

بعد میں ایرانی سرحد فورسز نے فائرنگ کی جس کے باعث ایک پاکستانی شہری سعید ریکی ہلاک اور اس کا بھائی زخمی ہو گیا۔

جس پر فرنٹیئرکور نے جوابی کاروائی کرتے ہوئے ایرانی سرحدی فورس کے تین اہلکاروں کو حراست میں لیکر ان سے تفتیش شروع کر دی ہے۔

ماشکیل سے مقامی صحافی فاروق کبدانی نے بتایا کہ ایرانی فورسز کے ہاتھوں پاکستانی شہری کی ہلاکت کے خلاف لوگوں نے احتجاج کیا اور حکومت سے فائرنگ میں ملوث ایرانی سکیورٹی اہلکاروں کو سخت سزاد ینے کامطالبہ کیا ہے۔

اس سلسلے میں مقامی انتظامیہ سے رابطہ کرنے کی کوشش کی جو بار آور ثابت نہ ہو سکی۔