پشاور میں ایرانی قونصل کے اہلکار کا قتل

عبدالحئی کاکڑ

بی بی سی اردو ڈاٹ کام، پشاور

حملہ آور پیدل آئے تھے اور انہیں پستول سے نشانہ بنانے کے بعد فرار ہونے میں کامیاب ہوگئے: پولیس

صوبہ سرحد کے دارالحکومت پشاور میں نامعلوم مسلح افراد نے ایرانی قونصل خانے کے شعبہ تعلقات عامہ کے انچارج ابوالحسن جعفری کو فائرنگ کرکے ہلاک کردیا ہے۔

پشاور میں گلبرگ پولیس سٹیشن کے آفسر عابدالرحمٰن نے بی بی سی کو بتایا کہ ابو الحسن جعفری کو جمعرات کی صبح آٹھ بجکر دس منٹ پر اپنے گھر کے قریب قتل کیا گیا ہے۔ ان کے مطابق مقتول دفتر جارہے تھے کہ مسلح افراد نے ان پر فائرنگ کی ہے۔

پولیس آفسر کے بقول ابتدائی تفتیش سے معلوم ہوا ہے کہ حملہ آور پیدل آئے تھے اور انہیں پستول سے نشانہ بنانے کے بعد جائے وقوعہ سے فرار ہونے میں کامیاب ہوگئے۔ ان کے مطابق حملے کے فوراً بعد انہیں سی ایم ایچ پہنچایا گیا جہاں پر انہوں نے زخموں کی تاب نہ لاکر دم توڑ دیا۔ تاہم بعض عینی شاہدین کا کہنا ہے کہ وہ موقع پر ہی ہلاک ہوگئے تھے۔

ابوالحسن جعفری کا شمار پشاور کے سینیئر ترین صحافیوں میں سے ہوتا تھا۔ وہ اگست انیس سو تریپن میں پشاور میں پیدا ہوئے تھے۔ وہ نسلاً قزلباش تھے۔ وہ ستر کی دہائی میں پشاور سول سیکریٹریٹ میں ملازم تھے جس سے انہوں نے بعد میں استعفیٰ دے دیا۔

ابوالحسن جعفری صوبہ سرحد کے سابق وزراء اعلیٰ مولانا مفتی محمود اور ارباب محمد جہانگیر کے پرسنل سٹاف کا حصہ بھی رہے تھے۔ انہوں نے انیس سو پچاسی میں انگریزی اخبار فرنٹیئر پوسٹ میں سٹی رپورٹرسے صحافت کا باقاعدہ آغاز کیا۔ انہوں نے پاکستان آبزرور، کسوٹی اور ملک کے دیگر اردو اور انگریزی اخبارات کے ساتھ کام کیا ہے۔

اسی دوران وہ پشاور میں واقع ایرانی قونصلیٹ کے ساتھ بھی منسلک ہوئے جہاں وہ آج کل شعبہ تعلقات عامہ کے انچارج اور پولیٹکل آفیسر کے طور پر خدمات سرانجام دے رہے تھے۔ انہیں ہندکو کے علاوہ پشتو، اردو، فارسی، عربی اور فرانسیسی زبان پر بھی عبور حاصل تھا۔