کوئٹہ میں بھی گرلز سکول پرحملہ

ایوب ترین

بی بی سی اردو ڈاٹ کام، کوئٹہ

کوئٹہ میں کچھ عرصے سے تعلیم سے وابستہ لوگ زیادہ نشانہ بن رہے ہیں

بلوچستان کے دارالحکومت کوئٹہ میں نامعلوم افراد کی جانب سے ایک گرلز ہائی سکول کی عمارت پر دستی بم کے حملے میں دو خواتین اساتذہ زخمی ہو گئی ہیں۔ تاہم کسی نے اس واقعے کی ذمہ داری قبول نہیں کی ہے۔ کوئٹہ میں پہلی بار گرلز سکول کو تخریب کاری کا نشانہ بنایا گیا ہے۔

مذکورہ سکول کوئٹہ شہر کے وسط میں منوجان روڈ پر واقع ہے۔ زخمیوں کو سول ہسپتال متقل کردیا گیا ہےجہاں ان کی حالت خطرے سے باہر بتائی گئی ہے۔

سکول کی پرنسپل مسز شہزاد وقار نے بتایا کہ دھماکہ اس وقت ہوا جب سٹاف روم میں اساتذہ کی میٹنگ ہورہی تھی۔ پرنسپل نے بتایا کہ دھماکے سے عمارت کو نقصان پہنچاہے مگر تمام طالبات محفوظ رہی ہیں۔

ایک سوال کے جواب میں مسز شہزاد کا کہنا تھا کہ انہیں اس قبل کوئی دھمکی نہیں ملی تھی۔ سکول میں صبح اور شام کی کلاسوں میں ایک ہزار سے زیادہ طالبات زیر تعلیم ہیں۔

دھماکے کے بعد سکو ل کو بند کردیا گیا۔ پولیس اور فرنٹیئرکور کی نفری نے مو قع پر پہنچ کر تحقیقات شروع کردی ہیں۔ بلوچستان کے دارالحکومت کوئٹہ میں یہ پہلی بار ہواہے کہ کسی نے گرلزسکول کو تخریب کاری کا نشانہ بنایا ہے۔

ڈپٹی انسپکٹر پولیس کوئٹہ شاہد نظام درانی نے بی بی سی اردو ڈاٹ کام کو بتایا کہ اس واقعہ کے پس پردہ ان قوتوں کاہاتھ ہے جو بلوچستان میں امن نہیں چاہتے ہیں۔

خیال رہے کہ کوئٹہ میں گزشتہ دو ہفتوں کے دوران تعلیم سے وابستہ افراد کو ٹارگٹ کلنگ کا نشانہ بنانے کا سلسلہ تیز ہوا ہے۔ ان واقعات میں صوبائی وزیر تعلیم شفیق احمد خان اور پروفیسر خورشیداحمد انصاری ہلاک جبکہ بلوچستان اعلیٰ ثانوی بورڈ کے سیکرٹری حامد محمود شدید زخمی ہوئے تھے جو اس وقت بھی زندگی اور موت کے کشمکش میں ہیں۔