سندھ ہائی کورٹ کا حکومت کو نوٹس

ریاض سہیل

بی بی سی اردو ڈاٹ کام، کراچی

کراچی کے بہت سے علاقے نو گو ایریاز میں تبدیل ہو گئے ہیں

سندھ ہائی کورٹ نے کراچی میں سیاسی جماعتوں کے کارکنوں کی ٹارگٹ کلنگ کے واقعات اور لوگوں کو تحفظ فراہم کرنے میں ریاست کی ناکامی کے خلاف دائر آئینی درخواست پر وفاقی اور صوبائی حکومتوں اور آئی جی سندھ پولیس کو نوٹس جاری کردیئے ہیں۔

یہ درخواست پاکستان ہیومن رائٹس کمیشن ساؤتھ ایشیا کے رکن اقبال کاظمی نے دائر کی ہے، جس کی سندھ ہائی کورٹ کے جسٹس مشیر عالم اور جسٹس محمد اطہر سعید پر مشتمل ڈویزن بینچ میں پیر کو سماعت ہوئی، عدالت نے ابتدائی سماعت کے بعد فریقین کو نوٹس جاری کردیئے۔

اقبال کاظمی نےاس درخواست میں موقف اختیار کیا ہے کہ رواں سال تیس جون تک کراچی کے مختلف علاقوں میں 445 افراد کو نشانہ بنا کر ہلاک کیا گیا ہے، جن میں ایم کیو ایم حقیقی کے 54 رکن اور ہمدرد شامل ہیں۔ یہ ہلاکتیں شاہ فیصل کالونی، ملیر سٹی، کھوکراپار، سعود آباد، ماڈل کالونی، اورنگی ٹاؤن، لانڈھی، کورنگی اور دیگر تھانوں کی حدود میں ہوئی ہیں مگر ان مقدمات میں ابھی تک کوئی بھی پیش رفت نہیں ہوسکی ہے۔

درخواست میں کہا گیا ہے کہ سرکار شہریوں کو تحفظ فراہم کرنے میں ناکام ہوئی ہے، شہر کے مختلف علاقوں میں نوگو ایریاز قائم ہوچکے ہیں جہاں مخالف لوگوں کا جانا ممکن نہیں رہا ہے۔

انہوں نے عدالت سے استدعا کی ہے کہ کراچی میں گزشتہ چھ ماہ میں ہونے والی ٹارگٹ کلنگ کے تفصیلات طلب کی جائیں اور اس کے ساتھ انٹیلی جنس اداروں کی رپورٹس بھی طلب کی جائیں جن کی روشنی میں کارروائی کی جائے۔ درخواست میں شہر سے غیر قانونی اسلحہ برآمد کرنے کے لیے آپریشن کا حکم جاری کرنے کی بھی درخواست کی گئی ہے۔

واضح رہے کہ کراچی میں کچھ عرصے سے سیاسی جماعتوں کے کارکنوں کی ٹارگٹ کلنگ جاری ہے، جس کا وفاقی حکومت نے نوٹس لیا تھا گزشتہ ماہ وفاقی وزیر رحمان ملک نے کراچی میں قانون نافذ کرنے والے اداروں کے حکام سے ملاقاتیں کی تھیں اور بتایا تھا کہ رینجرز کے اختیارات میں اضافہ کیا گیا ہے، جس کے تحت انہیں تلاشی اور گرفتاری کے اختیارات حاصل ہوجائیں گے۔

چودہ جولائی کو میڈیا سے بات کرتے ہوئے انہوں نے دعویٰ کیا تھا کہ آج کے بعد ٹارگٹ کلنگ کے واقعات نہیں ہوں مگر اس کے بعد بھی ٹارگٹ کلنگ کا سلسلہ جاری رہا۔ صرف گزشتہ ایک ہفتے میں ایم کیو ایم کے حمایت یافتہ ایک یونین کاؤنسل نائب ناظم اور پیپلز پارٹی کے دو اراکین قتل ہوچکے ہیں۔

وفاقی حکومت کی جانب سے ٹارگٹ کلنگ کی عدالتی تحقیقات کا اعلان کیا گیا تھا مگر وزارات داخلہ کی جانب سے تاحال کوئی نوٹیفیکیشن جاری نہیں ہوا، مگر اس سے پہلے درخواست کے ذریعے یہ معاملہ عدالت میں سماعت کے لیئے آگیا ہے۔

اس درخواست کے پٹیشنر بھی اقبال کاظمی ہیں جنہوں نے بارہ مئی دو ہزار سات کے روز ہونے والی ہنگامہ آرائی کے خلاف درخواست دائر کی تھی۔