یہ صفحہ دوست کو ای میل کیجیئے		پرِنٹ کریں

ٹینکر کے ٹوٹنے سے ساحل کا پانی تیل میں تبدیل ہوگیا

پاکستان میں حکام کا کہنا ہے کہ وہ کراچی بندرگاہ پر ٹوٹنے والے یونانی تیل بردار جہاز کے مالکان کو جرمانہ کرنے والے ہیں۔ اس جہاز کو پاکستان نیشنل شپِنگ کارپوریشن نے سڑسٹھ ہزار ٹن خام تیل کراچی لانے کیلئے کرایہ پر لیا تھا۔

کراچی پورٹ ٹرسٹ کے سربراہ نے کہا ہے کہ یونانی جہاز کے مالکان کو دو لاکھ ڈالر کا جرمانہ کیا جائے گا۔ پاکستانی حکام نے دعویٰ کیا ہے کہ اس جہاز سے تیل کا رِسنا اب بند ہوگیا ہے۔

کراچی سے بی سی سی کے نامہ نگار پال اینڈرسن کے مطابق ماہرین کہتے ہیں کہ ٹوٹے ہوئے جہاز سے جس میں تقریباً ستر ہزار ٹن تیل تھا، دس ہزار ٹن کے قریب تیل پانی میں بہہ چکا ہے اور خطرہ ہے کہ جہاز کے مکمل ٹوٹ جانے کی صورت میں سمندری راستوں میں رکاوٹیں پیدا ہو جائیں گی۔ جہاز سے تقریباً بیس ہزار ٹن تیل بچا کر محفوظ مقام پر پہنچا دیا گیا ہے۔ اس وقت جہاز پر چالیس ہزار ٹن تیل موجود ہے۔

کراچی پورٹ ٹرسٹ کے چیئرمین احمد حیات کا کہنا ہے کہ ماحولیاتی آلودگی پھیلانے پر جہاز کے مالکان کو جرمانہ کیا جائے گا جبکہ جہاز ران کمپنی اور اس کی انشورنس کرنے والوں کو دیگر اخراجات برداشت کرنے ہوں گے۔

ٹرسٹ کا کہنا ہے کہ جہاز سے تیل رسنا بند ہو گیا ہے لیکن انہیں اس بات کی تشویش ہے کہ اگر جہاز کے ٹوٹنے والے حصے بہتے ہوئے کراچی کے سمندری راستوں میں آگئے اور ان کی وجہ سے وہاں رکاوٹیں پیدا ہوگئیں تو صورتِ حال مذید خراب ہو سکتی ہے۔

غیرسرکاری تنظیم پاکستان ورلڈ وائڈ فنڈ کے ڈپٹی ڈائرکٹر جنرل ڈاکٹر اعجاز احمد نے بی بی سی سے بات کرتے ہوئے کہا کہ وہ متاثرہ ساحلی علاقے کی نگرانی کررہے ہیں اور نقصان کا اندازہ لگانے کی کوشش کی جارہی ہے۔

اعجاز احمد کا کہنا ہے کہ اس جہاز پر تین ٹینکروں میں خام تیل تھے جس میں سے دو ٹینکر ٹوٹنے سے محفوظ ہیں اور امید ہے کہ بیرون ملک سے ملنے والی امداد سے حالات پر قابو پانا ممکن ہوگا۔

ماحولیات کا دفاع کرنے والی تنظیموں کا کہنا ہے کہ کراچی کے ساحل پر سمندری نباتات اور مخلوقات کا خام تیل کے پانی میں پھیلنے سے وسیع پیمانے پر نقصان ہوگا۔