یہ صفحہ دوست کو ای میل کیجیئے		پرِنٹ کریں

جم کاویزل فلم میں حضرت عیسیٰ کا کردار ادا کر رہے ہیں

ایک سرکردہ یہودی تنظیم نے حضرت عیسیٰ کے بارے میں بنائی جانے والی متنازع فلم کی مذمت کی ہے اور کہا ہے کہ اس کی نمائش سے صیہونی دشمن جذبات کو ہوا مل سکتی ہے۔

میل گبسن کی اس فلم میں حضرت عیسیٰ کے مصلوب ہونے اور اس سے پہلے کے واقعات کی فلم بندی کی گئی ہے۔

یہودی تنظیم اینٹی ڈیفامیشن لیگ نے اپنے تازہ ترین بیان میں فلم کو ’خطرناک‘ قرار دیا ہے۔ بیان میں کہا گیا ہے کہ فلم میں یہودی انتظامیہ اور یہودی مجمع کو حضرت عیسیٰ کو مصلوب کرنے کے فیصلے کا ذمہ دار ٹھہرایا گیا ہے۔

تاہم میل گبسن کے ایک ترجمان نے کہا ہے کہ فلم میں شامل کوئی بات بھی صیہونیت مخالف نہیں ہے۔ کیتھولک پادریوں نے بھی فلم کو کیتھولک مخالف اور صیہونیت مخالف قرار دیتے ہوئے تنقید کا نشانہ بنایا ہے۔

یہودی تنظیم کا کہنا ہے کہ اس کے بین المذاہب رابطے کے ناظم رابی یوجین کون نے فلم یکھی ہے۔

رابی یوجین کون کا کہنا ہے کہ فلم میں کئی خطرناک نظریات شامل ہیں جن کا مقابلہ کرنے کے لئے عیسائیوں اور یہودیوں نے مل کر کام کیا ہے۔

انہوں نے امید ظاہر کی ہے کہ میل گبسن اور ان کی پروڈکشن کمپنی فلم پر نظرثانی کرنے پر غور کریں گے۔

گروپ کے نیشنل ڈائریکٹر ابراہم فوکسمین نے تشویش ظاہر کی ہے کہ اگر فلم موجودہ شکل میں ریلیز ہو گئی تو اس سے نفرت، مذہبی تعصب اور صیہونیت مخالف جذبات کو ہوا ملے گی جن کے خاتمے کے لئے ذمہ دار کلیسا نے بھی ہمیشہ کوشش کی ہے۔

لیکن میل گبسن کے ترجمان ایلن نیروب نے کہا ہے کہ اس فلم سے منسلک کسی بھی شخص کو نفرت، مذہبی تعصب اور صیہونیت مخالف جذبات کو ابھارنے سے کوئی دلچسپی نہیں ہے۔

’درحقیقت میل گبسن کا مفاد بالکل اس کے الٹ ہے کیونکہ انہوں نے اس فلم کے ذریعے محبت، امید، ایمان اور درگزر کرنے جیسے جذبات کو فروغ دینے کی کوشش کی ہے۔‘

فلم دی پیشن کے ہدایت کار میل گبسن ہیں جبکہ دی تھن ریڈ لائن میں اداکاری کے ذریعے شہرت حاصل کرنے والے جم کاویزل حضرت عیسیٰ کا کردار ادا کر رہے ہیں۔ مونیکا بیلوچی نے فلم میں بی بی مریم کا کردار ادا کیا ہے۔ فلم کے مکالمے لاطینی اور سامی زبانوں میں ہیں۔