یہ صفحہ دوست کو ای میل کیجیئے		پرِنٹ کریں

ہالی ووڈ کے مزاحیہ اداکار جم کیری

ملائیشیا میں سنسر بورڈ نے مذہبی امور کے وزیر کی جانب سے اعتراضات کے باوجود ہالی ووڈ کے اداکار جم کیری کی مزاحیہ فلم ’بروس آل مائیٹی‘ کی ریلیز کی منظوری دے دی ہے۔

فلم کی مقامی ڈسٹریبیوٹر کمپنی کی منیجر اینا اینجی کا کہنا ہے کہ سنسر بورڈ نے ہر زاوئیے سے اس فلم کا جائزہ لیا ہے اور انہیں اس میں کوئی قابلِ اعتراض بات نظر نہیں آئی۔

فلم میں جم کیری ایک ٹی وی رپورٹر کا کردار ادا کر رہے ہیں جو بعد میں ایک چیلنج کے طور پر خدا کی طاقت حاصل کرلیتا ہے تاکہ یہ دیکھ سکے کہ کیا وہ دنیا کوخدا سے بہتر چلا سکتا ہے۔

ابتدائی طور پر اس فلم کی نمائش سات اگست کو ملائیشیا میں ہونی تھی تاہم ملک کے مذہبی امور کے وزیر عبدلحامد زین العابدین کی جانب سے اعتراضات کے بعد اسے مؤخر کردیا گیا۔

ان کا کہنا تھا: ’ہم مذاق میں بھی اپنے آپ کو خدا کے برابر تصور نہیں کر سکتے۔‘

اب اس فلم کی نمائش ستمبر کے آغاز میں متوقع ہے۔

ملائیشیاایک اسلامی ملک ہے اور یہاں مذہبی بنیادوں پر امریکی فلموں یا فلموں کے چند حصوں کو اکثر سنسر کردیاجاتا ہے۔