 |
|
|
|
| ’خبرڈاکٹرکیلی نےدی تھی‘ |
ڈاکٹر کیلی نے خبر کا ذریعہ ہونے سے انکار کیا تھا
|
بی بی سی نے کہا ہے کہ ڈاکٹر کیلی اس خبر کا ذریعہ تھے جس میں کہا گیا تھا کہ برطانوی حکومت نے وسیع تباہی کے ہتھیاروں سے متعلق دستاویز میں بعض حقائق کو بڑھا چڑھا کر پیش کیا تھا۔
ڈاکٹر کیلی کی لاش آکسفورڈ شائر میں ان کے گھر کے قریب واقع جنگل میں پڑی ہوئی ملی تھی۔ پولیس نے کیلی کی لاش کی شناخت کے بعد کہا ہے کہ اس بات کے کوئی آثار نہیں ہیں کہ ڈاکٹر کیلی کی موت میں کوئی اور ملوث تھا۔
انسٹھ سالہ ڈاکٹر کیلی نے پارلیمانی کمیٹی کے سامنے بی بی سی اور حکومت کے درمیان اس متنازعہ دستاویز کے بارے میں بیان دیا تھا جسے عراق پر حملے کا جواز بنایا گیا تھا۔
رواں ہفتے کے آغاز پر ڈیوڈ کیلی نے اس الزام سے انکار کیا تھا کہ بی بی سی سے نشر ہونے والی اس خبر کا ذریعہ وہ تھے جس میں کہا گیا تھا کہ ڈاؤننگ اسٹریٹ نے عراق کے وسیع تباہی کے ہتھیاروں کے بارے میں جاری ہونے والی دستاویز کو بڑھا چڑھا کر پیش کیا تھا۔
جب سے وزارتِ دفاع نے یہ انکشاف کیا ہے کہ ڈیوڈ کیلی نے یہ بات تسلیم کر لی تھی کہ وہ عراق پر متنازعہ خبر دینے والے بی بی سی کے صحافی اینڈریو گیلیگن سے ملے تھے، تب سے وہ میڈیا کے مرکزِ نگاہ تھے۔ |
|
|
