مظفرآباد میں بھی حالات کچھ زیادہ اچھے نہیں ہیں۔ بہت سارے لوگ ایسے ہیں جنہیں راشن اور کپڑوں کی ضرورت ہے۔ مگر ہم چاہ کر بھی کچھ نہیں کر پا رہے۔ سب سے بڑی مشکل ’لیک آف کوآرڈینیشن‘ ہے۔ پتہ نہیں یہ سب کب تک ٹھیک ہوگا۔

یہاں سردی بھی بہت بڑھ گئی ہے، اتنی کہ مجھے خود بھی یہاں رکنا مشکل نظر آرہا ہے۔ خدا کرے کہ حالات مزید خراب ہونے سے پہلے اچھے ہو جائیں۔

آج ہم نے مظفرآباد کے نواحی علاقوں اور گھوڑی کا دورہ کیا۔ اب کیا کہوں، مسئلہ یہی ہے کہ امداد آرہی ہے، مگر جا کہاں رہی ہے یہ کسی کو نہیں پتہ۔
آج ڈاکٹر جاوید اقبال قادری اور ارشد اقبال قادری کے خاندانوں سے ملاقات ہوئی۔ زلزلے سے پہلے یہ لاکھوں میں کھیلتے تھے، مگر اب ان کے پاس کھانے کے لیے راشن تک نہیں ہے۔ انہی کی طرح ایسے نہ جانے کتنے خاندان ہیں جو سخت مشکل کا شکار ہیں۔

آج یہاں ہسپتال میں کچھ بچے سردی کی وجہ سے ہلاک بھی ہوئے۔ یہاں سب کچھ ٹھیک نہیں ہے۔ یہاں اس وقت راشن اور ادویات کی سخت ضرورت ہے۔

میری تمام لوگوں سے اپیل ہے کہ وہ خود یہاں آئیں اور دیکھیں یہاں کیا حالات ہیں۔ میں نے بی بی سی اردو پر یہ سلسلہ صرف اس لیے شروع کیا تاکہ میں یہاں کے حالات سے دنیا کو آگاہ کر سکوں۔ اس کے علاوہ میرا دوسرا کوئی مقصد نہیں۔ یہاں سردی کے ساتھ ساتھ حالات بھی بہت خراب ہو رہے ہیں۔


میں کچھ دیر بعد نیلم کے لیے روانہ ہو رہا ہوں۔ کوشش کروں گا کہ رابطے میں رہوں۔ کراچی اور اسلام آباد سے جو سامان آیا ہے وہ ہم آگے لے جانے کی کوشش کر رہے ہیں، مگر ہمارا لایا ہوا سامان بہت ہی کم ہے۔ چھوٹے بچے اور خواتین نمونیا کا شکار ہیں، راشن نہیں ہے، گرم کپڑوں کی سخت قلت ہے۔ میری تو سمجھ نہیں آ رہا کہ اتنے لوگوں کا انتظام کیسے ہوگا۔ ابھی تھوڑی دیر پہلے ایک ایسی خاتون سے ملاقات ہوئی جو پچھلے دو دن سے امداد کے انتظار میں ہیں۔ ان سے پوچھا کہ آپ کسی سے کچھ مانگتی کیوں نہیں؟ انہوں نے کہا کہ ’ہم شریف لوگ ہیں۔ کسی کے آگے ہاتھ نہیں پھیلاتے۔‘

ان کے ٹوٹے پھوٹے گھر میں میں ان کو بہت خطرہ ہے۔ ان کا بیٹا اب تک لاپتہ ہے۔ ان کے شوہر زلزلے میں ہلاک ہو گئے اور گھر میں ان کی چار جوان بچیاں ہیں۔
میری تمام لوگوں سے گزارش ہے کہ پلیز یہاں آئیں اور ایسے لوگوں کی مدد کریں۔ کہیں ایسا نہ ہو کہ بہت دیر ہو جائے۔
اگر آپ اس پر اپنی رائےدینا چاہیں تو یہاں کلک کریں