یہ ڈرامہ بی بی سی ورلڈ سروس ٹرسٹ کے ایک پائلٹ پراجیکٹ کا حصہ ہے جس کا مقصد شادی، فیملی، انسانی حقوق اور منشیات کے استعمال کے علاوہ کئی دیگر معاشرتی مسائل کو اجاگر کرنا ہے۔

ڈرامے کی کہانی پاکستان کے صوبہ پنجاب ایک خاندان کے گرد گھومتی ہے جس کا ایک حصہ برطانیہ میں مقیم ہے جبکہ دوسرا پاکستان میں۔

اب تک کی کہانی پڑھنے کے لیے کلک کریں

’پیار کا پاسپورٹ‘ کی تیاری میں اس بات کی بھرپور کوشش کی گئی ہے کہ اس میں وہ ایشوز اجاگر کیے جائیں جن کا تعلق لوگوں کی حقیقی زندگی سے ہو۔

بی بی سی اردو سروس کے علاوہ یہ ڈرامہ پاکستان کے کچھ ایف ایم ریڈیو سٹیشنوں سے بھی سنا جا سکتا ہے۔

حقیقی زندگی کے تجربات:

’پیار کا پاسپورٹ‘ کی تیاری میں اس بات کی بھرپور کوشش کی گئی ہے کہ اس میں وہ ایشوز اجاگر کیے جائیں جن کا تعلق لوگوں کی حقیقی زندگی سے ہو۔اس بات کو یقینی بنانے کے لیے ڈرامے کا سکرپٹ لکھنے سے پہلے کئی گروپوں اور لوگوں کے ساتھ سیر حاصل بحت کی گئی ہے۔ اس کے ساتھ ساتھ ہم نے اس بات کا بھی پوری طرح خیال رکھا ہے کہ لوگ ایک ریڈیو ڈرامے سے کیا توقعات رکھتے ہیں۔

ہماری تحقیقی ٹیم نے بچوں کے اغوا، منشیات کی سمگلنمگ اور زبردستی کی شادی جیسے مسائل سے دوچار کئی لوگوں سے بات چیت کی اور ان کی زندگی کا مطالعہ کیا۔ اس کے علاوہ ٹیم نے کئی ایسے گھرانوں کے خیالات بھی دریافت کیے جن کا ایک حصہ پاکستان میں ہے تو دوسرا برطانیہ میں رہتا ہے۔ ایسے منقسم گھرانوں میں بچوں کی آپس میں شادی اور اس سے منسلک مسائل اس ڈرامے کا مرکزی موضوع ہیں۔

مصنف اور اداکار:

’پیار کا پاسپورٹ‘ کے مصنفیں میں پاکستان کے تجربہ کار ڈرامہ نویس اور نئے لکھنے والے دونوں شامل ہیں۔ سکرپٹ رائیٹرز کی ٹیم میں مشہور ڈرامہ نگار نورالہداٰ شاہ کے علاوہ رخسانہ احمد، بی بی سی کے عارف وقار اورصحافی نبیلا مالک شامل ہیں۔ اس ٹیم نے بی بی سی کی ڈرامہ پروڈیوسر جسیکا ڈرومگول اور نوجوان فلمساز فرجاد نبی کےساتھ مل کر پاکستان میں ڈرامے کو مکمل کیا ہے۔