آصف جیلانی بی بی سی اردو ڈاٹ کام

آصف جیلانی نے آنکھ جامعہ ملیہ اسلامیہ میں کھولی جہاں ان کے والد اور والدہ دونوں تدریس سے منسلک تھے۔ آزادی کے وقت جامعہ کے محاصرہ کےدوران وہ ساتویں جماعت میں تھے اور ان کی عمر گیارہ برس کی تھی۔ انہوں نے اس محاصرہ میں جو کچھ دیکھا وہ انہوں نے بیان کیاہے:

---

شہر کے حال سے بےخبر  جامعہ میں گو تعطیلات تھیں لیکن اساتذہ اور وہ طالب علم جو فسادات کی وجہ سے اپنے گھروں کو نہیں جا سکے تھے، جامعہ میں مقیم تھے۔ انہیں قطعی کوئی علم نہیں تھا کہ شہر کا کیا حال ہے۔

آزادی کے فورا بعد دلی میں خونریز فرقہ وارارنہ فسادات کی ہولناک آگ بھڑکی ہوئی تھی اور قتل وغارت گری کا بازار گرم تھا۔ ہر طرف جنون اور خون تھا۔

شہر کے مضافاتی قصبہ اوکھلا میں کانگریس کا ہم نوا مسلم قوم پرست تعلیمی ادارہ جامعہ ملیہ اسلامیہ بھرپور محاصرہ میں تھا۔ اس کے تین سمت کٹر ہندوؤں کے گاؤں تھے اور چوتھی جانب جمنا کی نہر تھی۔ جامعہ میں گو تعطیلات تھیں لیکن اساتذہ اور وہ طالب علم جو فسادات کی وجہ سے اپنے گھروں کو نہیں جا سکے تھے، جامعہ میں مقیم تھے۔ انہیں قطعی کوئی علم نہیں تھا کہ شہر کا کیا حال ہے۔

ایک رات قرول باغ سے جامعہ کے اشاعتی ادارہ مکتبہ جامعہ میں کام کرنے والے لوگ سخت دہشت کے عالم میں جامعہ آئے۔ لٹے پٹے، بس تن پر اپنے کپڑوں کے ساتھ۔ وہ بین کر رہے تھے اور بتا رہے تھے کہ صبح سویرے مکتبہ پر بلوائیوں نے اچانک حملہ کیا اور سارا سامان لوٹ کر کتابوں میں آگ لگا دی۔

اس حملہ کی خبر جیسے ہی وزیر اعظم جواہر لعل نہرو کو ملی وہ فوراً وہاں پہنچ گئے۔ مکتبہ میں بھڑکتی آگ دیکھ کر وہ غصہ میں آپے سے باہر ہوگئے اور چلا چلا کر کہنے لگے ’ظالمو، کمبختو تم کیا کر رہے ہو؟ تمہیں معلوم ہے کہ علم کا کتنا بڑا خزانہ تم جلا رہے ہو؟‘ بلوائیوں نے جب ان کی بات نہ سنی تو نہرو نے دلی کے کمشنر رندھاوا کو، جو وزیر اعظم کی آمد کی خبر سن کر وہاں پہنچ گئے تھے، حکم دیا کہ بلوائیوں پر گولی چلا دی جائے۔ جب رندھاوا نے پس و پیش کی تو ہندوستان کے وزیر اعظم ایک سپاہی پر جھپٹے اور بلوائیوں پر فایرنگ کے لئے اس کے ہاتھ سے بندوق چھیننے کی کوشش کی لیکن رندھاوا اور دوسرے پولس افسر بیچ میں پڑ کر نہرو کو ایک طرف لے گئے۔ اس دوران پولس نے لاٹھی چارج کر کے بلوائیوں کو وہاں سےبھگا دیا۔

یہ کیسی بے کسی اور بے بسی تھی نئے نئے آزاد ہندوستان کے وزیر اعظم کی۔

مکتبہ جامعہ کے لٹے پٹے لوگوں کی بپتا سن کر جامعہ میں گھرے ہوئے لوگوں کے دل دھک سے رہ گئے اور ان پر شدید خوف طاری ہوگیا۔ کسی کے سمجھ میں نہیں آتا تھا کہ کیا کیا جائے۔

شیخ الجامعہ ڈاکٹر ذاکر حسین جن پر کشمیر جاتے ہوئے امرتسر کے ریلوے اسٹیشن پر قاتلانہ حملے کی کوشش کی گئی تھی، سخت وحشت کے عالم میں چند روز ہی پہلے جامعہ لوٹے تھے اور ڈاکٹروں نےانہیں حکم دیا تھا کہ وہ مکمل آرام کریں اور گھر سے باہر بالکل نہ نکلیں۔

جامعہ کے لوگ ابھی سراسیمگی کے عالم میں تھے کہ دیکھا ایک سرکاری کار بڑی تیزی سے جامعہ میں داخل ہوئی ہے۔ اس میں سے جواہر لعل نہرو نکلے۔ انہوں نے سب اساتذہ کو اسی میدان میں جمع کیا جہاں ایک سال قبل جامعہ کی سلور جوبلی کی تقریب میں ذاکر صاحب نے ایک ہی اسٹیج پر ایک طرف نہرو، آصف علی، مولانا ابولکلام آزاد اور راج گوپال اچاریہ کو اور دوسری جانب قائد اعظم، لیاقت علی خان اور سردار نشتر کو جمع کیا تھا اور للکارا تھا کہ ملک میں فسادات کی جو آگ لگی ہوئی ہے، وہ بر صغیر کی تہذیب کو خاکستر کر دے گی۔ یہ وقت اس بات کی چھان بین کا نہیں کہ یہ آگ کس نے لگائی ہے بلکہ وقت اس آگ کو بجھانے کا ہے۔

جامعہ میں بھڑکتی آگ  نہرو نے دلی کے کمشنر رندھاوا کو، جو وزیر اعظم کی آمد کی خبر سن کر وہاں پہنچ گئے تھے، حکم دیا کہ بلوائیوں پر گولی چلا دی جائے۔

علامہ مشرقی کے داماد اختر حمید خان نے، جو ثانوی کے نگران مدرسہ تھے، فوراً ایک فوجی کمان دار کی حیثیت سے کمان سمنبھال لی۔

جامعہ والوں کو ہندوستان کے وزیر آعظم نہرو کو ایک تعلیمی ادارہ جامعہ کے دفاع کی حکمت عملی وضع کرتے دیکھ کر سخت تعجب بھی ہوا کہ اتنے بڑے ملک کے وزیر آعظم ان کے تحفظ کے لئے یہ تدابیر کر رہا ہے اور ہمت بھی بندھی کہ آخر کوئی پرسان حال ہے۔

محمدعلی جوہر، حکیم اجمل خان اور ڈاکٹر مختار انصاری جیسے مسلم قوم پرستوں کے قائم کردہ اس ادارے کے تحفظ کے لئے، جس کے اساتذہ نے آزادی کے لئے قربانیاں دی تھیں، نہرو کی پریشانی تشویش اور تدبیر سے عیاں تھا کہ وہ یہ محسوس کر رہے تھے کہ یہ ایک قرض ہے جو ان پر واجب الادا ہے۔

جامعہ کا محاصرہ چار مہینے تک جاری رہا۔ اس دوران برابر کے گاؤں میں جا کر آٹا پسوانے اور کھانے پینے کی اشیا خریدنے کی کسی کو ہمت نہیں تھی۔ چنانچہ ہر شخص کو ایک تنوری روٹی میں سے کاٹ کر ایک چوتھائی حصہ ملتا تھا اور برسوں رکھی ارہر کی دال کھانے کو ملتی تھی، جس میں کیڑے پڑ گئے تھے اور جو کھاتے وقت پلیٹ میں تیرتے نظر آتے تھے۔ بچے زیادہ تر جھر بیری کے بیر توڑ کر اور باغبانی کی مولیاں اور گاجریں کھاکے گزارہ کرتے تھے۔

جنوری کے اوائل میں گاندھی جی نواکھالی، کلکتہ اور دوسرے فساد زدہ علاقوں کے دورے کے بعد دلی پہنچے تو سیدھے جامعہ آئے، جہاں آس پاس کے دیہاتوں سے بے گھر مسلمانوں کی بڑی تعداد پناہ گزیں تھی۔ گاندھی جی تین گھنٹے سے زیادہ دیر تک جامعہ میں رہے اور سارے وقت ایک چبوترے پر مسلم پناہ گزینوں کے بیچ بیٹھے رہے اور انہیں تسلی اور دلاسہ دیتے رہے۔ بار بار ایک لمبی آہ بھر کر کہتے ’بہت برا ہوا، بہت برا ہوا‘۔ ان کے چہرے سے کرب عیاں تھا، کہہ رہے تھے کہ میں پاکستان جا کر ان سب بھائیوں کو اپنے ساتھ واپس لاؤں گا جو یہاں سے چلے گئے ہیں۔ جاتے ہوئے کہنے لگے کہ میں فسادات کو رکوانے اور پاکستان کی رکی ہوئی پچپن کروڑ رقم ادا کرانے کے لیے مرن برت رکھوں گا۔

چنانچہ دوسرے روز جب گاندھی جی کے مرن برت کی خبر آئی تو فی الفور جامعہ کے اساتذہ اور طلبا شدید ڈر اور خوف کے باوجود محاصرہ سے نکلے اور آس پاس کے دیہاتوں کی گلیوں میں انہوں نے جلوس نکالا۔ وہ نعرہ لگا رہے تھے ’ہندو مسلم ایک ہو جاؤ، گاندھی جی کی جان بچاؤ‘۔

صرف دلی اسٹیشن  میں نے سرمہ کی ڈلی اور کباڑیوں کے ہاں سے پرانے ہیڈ فون کے کینز خرید کر ایک چھوٹا سا ریڈیو بنا رکھا تھا، جس پر صرف دلی اسٹیشن سنائی دیتا تھا۔

تیس جنوری کو اسی ریڈیو پر میں نے یہ خبر سنی کہ گاندھی جی کو پراتھنا سبھا میں قتل کر دیا گیا۔ قاتل کٹر ہندو نتھو رام گوڈسے تھا۔ میں نے جب بھاگ کر اساتذہ کو یہ خبر سنائی، تو کسی کو بھی یقین نہیں آتا تھا۔ چند ایک نے سرزنش بھی کی کہ کیا الٹی سیدھی خبر پھیلا رہا ہوں لیکن جب انہوں نے آکر میرے ریڈیو پر یہ خبر سنی تب انہیں اعتبار آیا۔ اس کے بعد ایک کہرام مچ گیا، نہ صرف جامعہ میں بلکہ پورے ملک میں۔ ایک روشنی تھی جو گل ہوگئی اور ہندوستان کے مسلمانوں نے یہ محسوس کیا کہ گاندھی جی نے ان کے لئے اپنی جان کی قربانی دےدی۔