عمر فاروق بی بی سی، حیدرآباد

	جمعہ کی رات رامالنگا راجو اور راما راجو نے آندھرا پردیش پولیس کے اعلی افسر کے سامنے سرنڈر کر دیا

گرفتاری کے بعد آندھرا پردیش کی پولیس نے ان سے پوچھ گچھ کی ہے تاہم سنیچر کو انہیں عدالت میں پیش کیا جائے گا۔

بدھ کو بی رامالنگا راجو کمپنی کے کھاتے میں سات ہزار کروڑ روپے سے زیادہ کی جعل سازی کی بات تسلیم کرتے ہوئے اپنے عہدے سے مستعفی ہوگئے تھے۔

سنیچر کی صبح راجو کی میڈیکل جانچ ہوئی کیونکہ وہ پچھلے کچھ روز سے دل کے مریض ہیں۔ ان کے وکیل بھرت کمار کے مطابق راجو اور ان کے بھائی راما راجو سے رات میں پوچھ گچھ ہوئی ہے۔

پولیس کے مطابق ستیم کمپنی کے سابق فائنانس افسر ولدا مڑی سرینیواس کو بھی گرفتار کیا گیا ہے۔

حکومت نے ستیم بورڈ کو خارج کر دیا ہے اور اس میں حکومت کی جانب سے 10 ڈائرکٹرز بنانے کا فیصلہ کیا گیا ہے۔ بورڈ کی پہلے سے طے سنیچر کو ہونے والی میٹنگ اب نہیں ہوگی۔

ہندوستان میں کمپنیوں کے معاملات کے وزیر پریم چند گپتا نے کہا ستیم کا موجودہ بورڈ وجود میں نہیں ہے۔ انہوں نے یہ بھی بتایا کہ سنیچر وہ وزير اعظم سے ملاقات کرانہیں حالات کی جانکاری دیں گے۔

جمعہ کی رات رامالنگا راجو اور راما راجو نے آندھرا پردیش پولیس کے اعلی افسر کے سامنے سرنڈر کر دیا۔

ریاستی پولیس نے انہیں گرفتار کر لیا اور معاملات کی تفتیش ریاست کی سی آئی ڈی کی جرائم برانچ کو سونپ دی ہے۔ پولیس نے ان کے خلاف اقتصادی جرائم کے کئی مقدمے درج کیے ہیں۔

ستیم کمپیوٹرز کا کاروبار کئی ممالک میں پھیلا ہوا ہے اور اس کے پچاس ہزار سے زیادہ ملازم ہیں۔

ستیم سکینڈل سامنے آنے کے بعد ہندوستان کا حصص بازار گر گیا تھا اور پھر دنیا کے سرمایہ کاروں میں افرا تفری مچ گئی تھی۔