سبیر بھومک بی بی سی، کولکاتہ

	آسام میں علیحدگی پسند تحریک ایک عرصے سے چلی آرہی ہے جس کے نتیجے میں تشدد کے واقعات عام ہیں

آسام کے پولیس چیف جی ایم شریواستو نے بی بی سی کو بتایا بم دھماکے میں 23مسافر زخمی ہوئے ہیں جن میں سے بعض کی حالت نازک ہے۔

مسٹر شریواستو کا کہنا تھا ’مرنے والی کی تعداد بڑھ سکتی ہے کیونکہ بعض زخمیوں کی حالت بہت نازک ہے۔‘

ٹرین جنوبی آسام کے لمبڈنگ ریلوے اسٹیشن سے شمالی آسام کے علاقے تنسوکیا جارہی تھی۔

بم پہاڑی علاقے کاربی انگلونگ کے دیپو ریلوے سٹیشن پر رکی اور مسٹر شریواستو کا کہنا ہے کہ ’اسی وقت ایک بم دھماکہ ہوا اور بم شاید ایک بیگ میں تھا۔‘

زخمیوں کو دیپو کے سرکاری ہسپتال میں داخل کرادیا گیا ہےلیکن جن زخمیوں کی حالت نازک ہے انہیں گوہاٹی کے ہسپتال لے جایا جارہا ہے۔

حالت نازک  ’مرنے والی کی تعداد بڑھ سکتی ہے کیونکہ بعض زخمیوں کی حالت بہت نازک ہے۔   جی ایم شریواستو

آسام میں کسی بھی علیحدگی پسند تنظیم نے ابھی تک دھماکے کی ذمہ داری نہیں لی ہے۔ لیکن پولیس کو شک ہے ان دھماکوں کو پیچھے کاربی میں علیحدگی پسند تنظیم کاربی لونگری نیشنل لبریشن فرنٹ کا ہاتھ ہوسکتا ہے۔

یہ گروپ ماضی میں کاربی انگلانگ میں ہندی بولنے والوں پر حملے کرنے میں ملوث رہا ہے اور پیر کو گروپ نے آزاد خطے کے لیے ہڑتال کی کال دی تھی۔

آسام میں 30 اکتوبر کو نو بم دھماکے ہوئے تھے جس میں آسام کے چار علاقوں میں 80 افراد ہلاک ہوئے تھے۔ بیشتر ہلاکتیں گوہاٹی میں ہوئی تھیں۔

آسام حکومت نے الزام لگایا تھا کہ ان دھماکوں کے پیچھے علیحدگی پسند تنظیم یونائیٹیڈ لبریشن فرنٹ اور نیشنل ڈیموکریٹک فرنٹ آف بوڈولینڈ کا ہاتھ تھا۔