شکیل اختر بی بی سی اردو ڈاٹ کام، دلی

	لال کرشن اڈوانی آج کل انتخابی مہم پر ہیں

چھتیس گڑھ میں ایک انتخابی ریلی سے خطاب کرتے ہوئے مسٹر اڈوانی نے مالیگاؤں بم دھماکوں میں بعض مشتبہ ہندو شدت پسندوں کی گرفتاری کا ذکر کرتے ہوئے کہا کہ اس کے ذریعے پورے ہندو سماج کو بدنام کیا جا رہا ہے۔

انہوں نے کہا ’ ہم نے تو کبھی مسلم دہشت گردی کی چرچا نہیں کیا۔ پنجاب میں جب دہشت گردی تھی تو کبھی ہم نے اسے سکھ دہشت گردی نہیں کہا تو آج آخر ہندو دہشت گردی کا نام کیوں دیا جا رہا ہے۔‘

مسٹر اڈوانی نے کہا کہ کانگریس کی حکومت مسلمانوں کے ووٹ حاصل کرنے کے لیے ہندو سماج کو بدنام کر رہی ہے ۔ انہوں نے کہا ’ووٹ کی سیاست سے دہشت گردی کا مقابلہ نہیں کیا جا سکتا۔‘

بی جے پی کے سابق صدر وینکیا نائڈو نے بھی مالیگاؤں بم دھماکے کے سلسلے میں بعض ہندومذہبی رہنماؤں اورایک فوجی افسر کی گرفتاری پر نکتہ چینی کی تھی۔ ایک نیوز کانفرنس میں انہوں نے الزام لگایا تھا کہ کانگریس کی حکومت سی بی آئی اور اے ٹی ایس کو اپنے سیاسی مقاصد کے حصول کے لیے استعمال کر رہی ہے۔

کانگریس کی حکومت مسلمانوں کا ووٹ حاصل کرنے کے لیے ہندو سماج کو بدنام کر رہی ہے ۔   بی جے پی رہنما لال کرشن اڈوانی

حکمراں کانگریس نے بی جے پی پر دوہری پالیسی اختیار کرنے کا الزام لگايا ہے۔ پارٹی کے ترجان منیش تیواری نے کہا کہ جب سیکیوریٹی فورسز نے ملک میں دیگر بم دھماکوں کا معاملہ بے نقاب کیا تھا تو یہی بی جے پی کی قیادت پولیس کی پیٹھ تھپتھا رہی تھی’ لیکن جب مالیگاؤں کے بم دھماکے کی تفتیش نے ایک نئی سمت اختیار کر لی تو انہوں نے دہشت گردی کے کے معاملے پر اچانک اپنا پورا موقف ہی بدل دیا۔‘

منیش تیواری کا کہنا ہے کہ پولیس اور تفتیشی ادارے مکمل آزادی کے ساتھ اپنی تفتیش کر رہے ہیں ’ یہ بی جے پی ہے جو دہشت گردی کو فرقہ وارانہ رنگ دینے کی کوشش کر رہی ہے۔ یہ پارٹی دہشت گردی کو مذہبی اور سیاسی نظریے سے دیھکنا چاہتی ہے۔‘

مالیگاؤں بم دھماکے میں دو سادھوؤں سمیت نو مشتبہ ہندوؤں کی گرفتاری کے بعد یہ معاملہ کانگریس او ر بی جے پی کے درمیان مسلسل بحث و تکرار کا موضوع بنا ہوا ہے۔ بی جے پی کی ہمنوا ہندو تنظیمیں گرفتار کیے گئے مشتبہ افراد کو بے قصور سمجھتی ہیں اور وہ ان کی قانونی مدد کے لیے چندہ جمع کررہی ہیں۔