وزیر خزانہ کا کہنا تھا کہ سنسکس کے گرنے کو ملک کی معیشت سے پوری طرح جوڑنا صحیح نہیں ہوگا

بدھ کو حصص بازار میں سات سو پوانٹس کی گرواٹ آئی اور ایک وقت ایسا بھی آیا جب بازار 11000 پوائنٹس سے نیچے چلا گیا تھا۔ بازار میں اتنی گراوٹ گزشتہ دو برس بعد آئی ہے۔

وزیر خزانہ کا کہنا تھا کہ سنسکس کے گرنے کو ملک کی معیشت سے پوری طرح جوڑنا صحیح نہیں ہوگا۔

ان کا کہنا تھا ’سرمایہ کاروں کو دقت ضرور ہو رہی ہے لیکن انہیں فکر کرنے کی ضرورت نہیں ہے کیونکہ معیشت کی بنیاد بہت مضبوط ہے۔‘

گذشتہ نو مہینوں ميں سنسکس 21000 سے گر کر 11000 کے آس پاس پہنچ گیا ہے۔

ادھر منصوبہ بندی کمیشن کے نائب سربراہ مونٹیک سنگھ اہلووالیہ نے کہا ہے کہ سرمایہ کاروں کو بازار میں قائم رہنا چاہیے کیونکہ جیسے ہی امریکی بازار میں بہتری آئے گی ویسے ہی ہندوستان بازار بھی اوپر جائے گا۔

ان کا کہنا تھا ’بھارتی بازار میں گراوٹ آنا کوئی انوکھی بات نہیں ہے اور یہ امریکی بازار کے سبب ہو رہا ہے، اس سے ہندوستانی بازار کو دقت نہیں ہے۔‘

اقتصادی معاملات کے ماہر ایم کے وینو کے مطابق موجودہ حالات سے معیشت کی ترقی کی رفتار نو سے کم ہو کر سات فیصد ہو سکتی ہے۔

ان کے مطابق ترقی کی شرح نو سے سات فیصد آئے تو تھوڑی دقتیں ضرور آئیں گی۔ لیکن اگر امریکہ میں ترقی کی شرح صفر بھی ہو جائے تو بھی ہندوستان ساڑھے چھ فیصد کی شرح سے ترقی کر سکتا ہے۔

انہوں نے مزید کہا کہ اس سے میوچئل فنڈ فروخت کرنے والوں ، بروکرز اور رئل اسٹیٹ سے جڑے لوگوں کو دقت ہوگی۔