ریاض مسرور بی بی سی اُردو ڈاٹ کام، سرینگر

	سلمان نے سرینگر میں جہاد کونسل کے سربراہ کو ’میوزیکل جہاد‘ کی دعوت دی

یہ خصوصی کنسرٹ ساؤتھ ایشیا فاؤنڈیشن نامی غیر سرکاری ادارے کے زیرِ اہتمام منعقد ہوا جس میں سِول اور پولیس حکام کے علاوہ طلبا و طالبات نے بھی شرکت کی۔ کنسرٹ میں گو کہ پرجوش لڑکے اور لڑکیوں کی خاصی تعداد موجود تھی، لیکن اس میں عام شائقین نے شمولیت نہیں کی اور یونیورسٹی اور مختلف تعلیمی اداروں سے طلباء وطالبات کو بسوں میں لایا گیا تھا۔

’خوش کر دیا‘  پاکستان میں غزل کا رواج کم ہورہا ہے، جو اچھی بات نہیں ہے۔ اب تو وہاں راک کا رواج ہے۔ لیکن جنون نے صوفی موسیقی کو مغربی موسیقی کی آمیزش کو پیش کر کے واقعی طبیعت خوش کردی   فاروق عبداللہ

سلمان نے کنسرٹ کے اختتام پر بی بی سی کو بتایا کہ ’کشمیر میں کنسرٹ کرنے کا بہت دیر سے خواب تھا جو آج پورا ہوگیا۔ لوگوں نے جو پیار دیا وہ مثالی ہے۔ میں نے آج تک اتنا جذباتی احتجاج نہیں دیکھا‘۔

ریاست کے سابق وزیراعلیٰ ڈاکٹر فاروق عبداللہ نے بتایا کہ ’جنون کے فنکاروں کی کشمیر آمد سے ہندپاک تعلقات مزید بہتر ہوجائینگے۔‘ مسٹر عبداللہ کا کہنا تھا کہ وہ ذاتی طور غزل کے بہت شوقین ہیں۔ ’پاکستان میں غزل کا رواج کم ہورہا ہے، جو اچھی بات نہیں ہے۔ اب تو وہاں راک کا رواج ہے۔ لیکن جنون نے صوفی موسیقی کو مغربی موسیقی کی آمیزش سے پیش کر کے واقعی طبیعت خوش کر دی‘۔

’امن کا پیغام‘  کشیدہ ماحول میں لوگوں کی طبیعت ہلکی کرنے کے لیے ایسی تقاریب ضروری ہوتی ہیں۔ جنون بینڈ کی آمد امن کا پیغام ہے   کلدیپ کمار کھوڑا

واضح رہے جنون بینڈ میں شرکت کے خلاف کشمیر یونیورسٹی کے طلباء نے بائیکاٹ کی کال دی تھی۔ پاکستان کے زیرانتظام کشمیر میں مقیم وادی میں سرگرم کئی مسلح گروپوں کے اتحاد متحدہ جہاد کونسل نے پاکستانی حکام سے اپیل کی تھی کہ وہ جنون بینڈ کو کشمیر میں کنسرٹ کی اجازت نہ دیں کیونکہ ’یہ کشمیریوں کے زخموں پر نمک پاشی کے مترادف ہوگا‘۔

اس کے جواب میں سلمان نے ہفتے کو سرینگر میں ایک پریس کانفرنس کے دوران جہاد کونسل کے سربراہ اور مقامی مسلح تنظیم حزب المجاہدین کے سپریم کمانڈر سید صلاح الدین کو ’میوزیکل جہاد‘ کی دعوت دی تھی۔