چارلیز تھیرون کو فلم ’مونسٹر‘ میں اپنے کردار پر بہترین اداکارہ کا آسکر ایوارڈ ملا تھا

سنہ دو ہزار تین میں فلم ’مونسٹر‘ میں اپنے کردار کے لیے آسکر ایوارڈ پانے والی اداکارہ تھیرون خواتین کے خلاف تشدد پر خصوصی توجہ دیں گی۔

جنوبی افریقہ میں پیدا ہونے والی اداکارہ چارلیز تھیرون اب امریکی شہری ہیں۔ وہ جنوبی افریقہ میں بچوں اور ان کے خاندان میں ایچ آئی وی/ ایڈز کی آگہی پھیلانے کے ایک پراجیکٹ کی سربراہ ہیں۔

33 سالہ اداکارہ کو باقاعدہ طور پر اقوامِ متحدہ میں پیر کو شامل کیا جائے گا۔

بانکی مون نے انہیں پیغامبر مقرر کرتے ہوئے کہا: ’آپ نے اپنی زبان، جذبات اور عوام سے خصوصی رشتے کو ایک بہتر دنیا بنانے کے لیے استعمال کیا ہے۔‘

تھیرون کو فلم مونسٹر میں ایک سیریئل کلر ایلین وورنس کا کردار ادا کرنے پر آسکر ملا تھا۔ ایلین وورنس کی تشدد اور زیادتی کے ماحول میں پرورش ہوئی تھی۔ اس کو سنہ دو ہزار دو میں سزائے موت دے دی گئی تھی۔

سنہ دوہزار پانچ میں بننے والی فلم ’نارتھ کنٹری‘ میں تھیرون نے جنسی ہراس کا شکار ایک عورت کا کردار ادا کیا تھا۔

تھیرون اقوامِ متحدہ کی دسویں امن کی سفیر بنی ہیں۔ ان سے قبل امن کے سفیر بنائے جانے والوں میں اداکار جارج کلونی اور مائیکل ڈگلس، برطانوی فطرت نگار جین گوڈال، اور برازیل کے مصنف پاؤلو کوئلو شامل ہیں۔