ناول مِڈنائٹ چلڈرن کو گزشتہ چالیس سال کے دوران بُکر ایوارڈ حاصل کرنے والے ناولوں میں بہترین قرار دیا گیا

بیسٹ آف بُکر کا فیصلہ عوامی ووٹ کے ذریعے ہوا جس کی نتائج کی بنیاد پر سن انیس سو اکیاسی میں شائع ہونے والے ناول مِڈنائٹ چلڈرن کو گزشتہ چالیس سال کے دوران بُکر ایوارڈ حاصل کرنے والے ناولوں میں بہترین قرار دیا گیا۔

یہ سلمان رشدی کو ملنے والا تیسرا بُکر ایوارڈ ہے کیونکہ سن انیس سو اکیاسی میں مڈنائٹ چلڈرن پر بُکر ایوارڈ حاصل کرنے کے بعد انہوں نے سن انیس سو ترانوے میں اسی ناول پر بُکر آف بُکرز ایوارڈ بھی حاصل کیا تھا۔

اس موقع پر اپنے پیغام میں سلمان رشدی نے ’بیسٹ آف بُکر‘ کو ایک بہترین خبر قرار دیا اور کہا کہ انہیں یہ خبر سن کر انتہائی خوشی ہوئی ہے۔ انہوں نے دنیا بھر میں اپنے ان قارئین کا شکر ادا کیا جنہوں نے مِڈ نائٹ چلڈرن کے حق میں ووٹ دیا۔

سلمان رشدی نے لندن کے ساؤتھ بینک سنٹر ہونے والی ایوارڈ تقریب میں شرکت نہیں کی کیونکہ وہ آج کل امریکہ کے دورے پر ہیں۔ ان کا ایوارڈ ان کے بیٹوں ظفر اور میلان نے حاصل کیا۔

آٹھ جولائی کو دن بارہ بجے ووٹنگ بند ہونے تک سات ہزار آٹھ سو ایک افراد آن لائن اور ٹیکسٹ کے ذریعے ووٹ ڈال چکے تھے اور ان میں سے چھتیس فیصد نے مِڈنائٹ چلڈرن کے حق میں ووٹ دیا تھا۔

بیسٹ آف بُکر ایوارڈ کے لیے سلمان رشدی کے علاوہ پیٹر کیری، پیٹ بارکر، جے ایم کوٹزی، نادِین گورڈیمر اور جے جی فیرل کو بھی شارٹ لِسٹ کیا گیا تھا۔

نامزدگی کا عمل ماہرین کے ایک پینل کے زیر نگرانی انجام پذیر ہوا جن میں ناول نگار وکٹوریہ گلین ڈائننگ اور براڈکاسٹر ماریلا فراسٹرپ بھی شامل تھیں۔

وکٹوریہ گلین ڈائننگ کا کہنا ہے کہ قارئین نے ہزاروں کی تعداد میں ووٹ ڈالے ہیں اور ہمارے خیال میں انہوں نے صحیح فیصلہ کیا ہے۔

ان کا کہنا ہے کہ مِڈنائٹ چلڈرن نے ایک لمبے مارجن سے ایوارڈ جیتا ہے۔

بکر ایوارڈ سن انیس سو انہتر میں شروع کیا گیا تھا اور اب تک اکتالیس ادیب یہ ایوارڈ جیت چکے ہیں کیونکہ انیس سو چوہتر اور انیس سو بانوے میں دو دو ادیبوں کو مشترکہ طور پر اس کا حقدار قرار دیا گیا تھا۔