کلونی نے ڈارفر میں انسانی مصائب کو قریب سے دیکھا اور محسوس کیا ہے

اقوام متحدہ کے سیکرٹری جنرل بان کیمون نے کلونی کی تعریف کرتے ہوئے کہا ہے انہوں نے ڈارفور میں شعور کی بیداری کے لیے بہترین کام کیا ہے۔

کلونی اس موقع پر اعلان کیا کہ وہ دنیا کے مشکل اور خطرناک علاقوں میں اقوام متحدہ کے اہم کام کی حمایت میں مہم چلائیں گے۔ ان کا کہنا تھا کہ اقوام متحدہ کی طرف سے ذمہ داری ملنا ان کے لیے اعزاز کی بات ہے۔

سال دو ہزار چھ میں کلونی نے اقوام متحدہ کی سکیورٹی کونسل کے سامنے ایک پرجوش خطاب میں کہا تھا کہ ان کے سامنے (ڈارفور میں) نسل کشی ہو رہی ہے۔

امن کے دوسرے پیغامبر  اقوام متحدہ کے امن کے آٹھ دوسرے پیغامبروں میں مصنف پاؤلو کویلو اور اداکار مائیکل ڈگلس بھی شامل ہیں

گزشتہ سال اپریل میں کلونی نے ڈارفور میں متاثرہ لوگوں کی مدد کے لیے ایک فنڈ بھی قائم کیا تھا۔ اس فنڈ کے تحت اب تک نو اعشاریہ تین ملین ڈالر اکٹھے کیے گئے ہیں۔

ڈارفور (سوڈان) میں حکومت اور باغی گروہوں کے درمیان پانچ سال سے جاری تصادم میں کم از کم دو لاکھ لوگ ہلاک ہو چکے ہیں جبکہ بیس لاکھ لوگ نقل مکانی پر مجبور ہیں۔

بان کیمون کا کہنا ہے کہ کلونی نے ڈارفور میں انسانی مصائب کو قریب سے دیکھا اور محسوس کیا ہے۔ کلونی کے علاوہ اقوام متحدہ کے امن کے آٹھ دوسرے پیغامبروں میں مصنف پاؤلو کویلو اور اداکار مائیکل ڈگلس بھی شامل ہیں۔