مائیکل جیکسن کے والد کی درخواست مسترد

جو جیکسن اپنے بیٹے کی جائیداد میں سے کچھ نہیں لے سکتے ہیں اور یہ فیصلہ ان کے بیٹے کا تھا: عدالت

امریکہ کی ایک اعلٰی عدالت نے کہا ہے کہ پاپ سٹار مائیکل جیکسن کے والد جو جیکسن اپنے بیٹے کے کسی بھی اثاثے کے حق دار نہیں ہیں۔

امریکی شہر لاس اینجلس کی ایک اعلٰی عدالت کے جج مچل بیکلوف نےجو جیکسن کی اس درخواست کو بھی مسترد کر دیا ہے جس میں انھوں نے آنجہانی پاپ سٹار کی جانب سے ان کی وصیت پر عمل درآمد کرانے والوں کو چیلنج کیا تھا۔

عدالت کے فیصلے کے مطابق ’جو جیکسن اپنے بیٹے کی جائیداد میں سے کچھ نہیں لے سکتے ہیں اور یہ فیصلہ ان کے بیٹے کا تھا۔‘ عدالت جو جیکسن کی اس درخواست کی سماعت دس دسمبر کو کرے گی جس میں انھوں نے جائیداد سے ماہانہ وظیفے کی درخواست کی ہے۔ جو جیکسن کے مطابق ان کا ماہانہ خرچ پندرہ ہزار ڈالر سے زائد بنتا ہے۔

اکیاسی سالہ جو جیکسن کے وکیل نے لاس اینجلس کی عدالت میں ایک عرضی دی تھی جس کے مطابق ان کے ماہانہ اخراجات بیس ہزار ڈالر ہیں جبکہ حکومت انہیں صرف سترہ سو ڈالر دیتی ہے۔

اس میں یہ بھی کہا گیا ہے کہ مائیکل جیکسن کی پچیس جون کو اچانک موت کے بعد ان کی جائیداد سے تقریباً دس کروڑ ڈالر کی کمائی ہوئی ہے۔

اس عرضی پر مائیکل جیکسن کی جائیداد کی دیکھ بھال کرنے والے وکیل ہاورڈ وتزمین نے اس پر حیرت کا اظہار کیا تھا۔ ’جیکسن کی عرضی پر ویسے ہی غور کیا جائیگا جیسے مائیکل کی جائداد سے دوسری درخواستوں پر کیا گیا ہے۔‘

مائیکل جیکسن نے اپنی وصیت نامہ میں اپنے باپ کو علیحدہ رکھا تھا لیکن اپنی ماں اور بچوں کا وصیت میں ذکر کیا تھا۔گزشتہ ماہ عدالت نے ان کی ماں کیتھرین جیکسن اور بچوں کے لیے ماہانہ وظیفہ منظور کیا تھا۔

وکیل نے عدالت میں جو کاغذات جمع کیے تھے اس کے مطابق جو جیکسن کی کوئی باقاعدہ آمدنی نہیں ہے اور گزشتہ کئی برسوں سے وہ اپنے بیٹے کے پیسوں پر جیتے رہے ہیں جو انہیں ان کی بیوی کیتھرین کے ذریعے ملتے ہیں۔ عرضی میں مسٹر جو کی بیماریوں کا بھی ذکر کیا گیا تھا۔

مائیکل جیکسن کی والدہ کیتھرین جیکسن نے اپنے بیٹے کی جائیداد کی دیکھ بھال کرنے والوں کے خلاف درخواست واپس لے لی ہے۔