Library

Ir ye for tha moss tha year?

Ir ye for tha moss tha year?

Ullans Speakers Association - Article 41 - April 2012
By Charlie ‘Tha Poocher’ Reynolds

Whun A wus a wean leevin in North Entrim, aroon aboot Aister ye wud hae h’ard yins roon aboot axin, “Ir ye taakin a bink tha year? This wus becaase awa baak then, if ye leeved in tha country an wur near a moss, ye wud hae got yer year’s firin bae cuttin peats. It wus seen as a chape wye o’ keepin yer hoose het through tha lang wunter dey. Noo A’m naw sae sure aboot it baen chape, becaase it tane ye tha maist three ir fower months afore ye had tha peats hame in tha loanin. Mae granfeyther wud alwyes tane aff tae tha moss on an Aister Monday tae dae a bit o’ parin an hae a luk at tha rodden: it wus jest second naetur tae him - it wus somethin he had aye dane an his feyther afore him.

Tha peat-cuttin sayson wus a femelie affair becaase ye wud hae needit a loc help tae get them cut, turned, kassled an - if tha wather alloaed - get them doon tha rodden an hame. A dinnae know mair nir a hanfu wha cut peats noo-a-deys, naw wae tha oul peat spaide onywye. Tha cuttin is nearly a dane bae a machine noo an lees tha hale moss lukin mair lake a feil in tha moon. A wee freen o’ mae ain toul mae yin time that tha machine-cut peats wur mair lake donkey dung nir firin.

Aff coorse awa baak in tha 1950’s, tha moss wus fu o’ guid country folk a tryin tae get a year’s firin. They wud hae wrocht in tha evenins an Seterdeys an deed they wud hae spent ony time aff they micht hae had frae thaur place o’ employment. As a sed afore, tha wather cud hae been yer freen if it wus guid but if it wus a bad wat simmer, ye wud niver hae got yer peats hame.

Noo tha moss tae me is jest a memory for a flitted intae Cuilren whun a wus a waen but am proud tae sae that am tha proud owner o’ mae granfeyther’s peat spaide, but mine ye, A’m niver tempted tae gae aff an try an get a bink - fur A cannae see tha peats baen ony use in a economy seven hoose. Hooiver A kan close mae een an see tha happy faces o’ mae ain folk whun they wur bringin hame tha peats.


You might also like