Ullans Speakers Association - Article 40 - March 2012
By Charlie ‘Tha Poocher’ Reynolds
A wus sittin tha ither dey, tryin tae keep tha sun oot o mae een, whun a thocht rin through mae heid. Noo, Am naw sae sure if that is a guid thing - but here it is onywye.
A think oor Ullans tongue needs tae become oor Nummer Yin tongue.
‘Noo what is he channerin on aboot?’ A hear yese ax. Weel it’s lake this here.
A hae noticed whiles, whun yins wha taak naethin but Ullans at hame, ir oot aboot ither places, they wud stert taakin soarta English. If they ir interviewed on tha wireless ir tha lake, they slide intae a mair ‘polite vocabulary’ an forget thaur moather tongue.
Noo tha rayson for that micht bae that they hae bane miscaa’ed aa thaur deys bae tha yins in tha educashun system wha seem tae know mair nir tha rest o is. They ir affronted tae spake thaur ain tongue for fear o maakin themsels luk lake gomeys.
Noo maesel, Am as bad as tha rest for A hae nae bother taakin on tha wireless in tha tongue mae ain yins taaked aa thaur deys - but tha minute A hit Cuilren, a graet change comes ower mae. Shame on mae, but if A dinnae stert taakin tha wye tha toon yins taak.
Then aff coorse, whiles if ye hard mae telephone tongue, ye wud think A wus oot o Eton college.
A cannae unnerstan tha rayson for this for A hae noticed that it seems tae bae jest tha Ullans taakers wha dae this. Wae seem tae bae tha yins wha haetae change. Why?
Aff coorse thaur is a wheen o guid folk - mine ye, they ir licht on the grun - wha taak tha Ullans tongue nae odds whaur they ir. A tak mae kep aff tae them for they ir proud o thaur native tongue - an the rest o is wull hae tae learn frae them.
Becaase, its tha only wye tha rest o the wurl wull taak heed o is an see that wae hae a tongue o whaur ain - an that wur naw feart tae use it. It kan only help keep oor tongue leevin - an wull fair shut up tha yins wha sae that they niver hard tha Ullans tongue.
Aff coorse, A mann maak a stert maesel an try an spake tha wye A ocht tae, tha wye mae ain yins in North Entrim spake. Keep it Ullans.