Library

Haggin’ fir ir rizin’ tha Deil

Haggin’ fir ir rizin’ tha Deil

Ullans Speakers Association - Article 8 - May 2009

Dae ye know this its odd tha wye things wud cum intae yer heid whiles. Noo, A wus jest sittin’ tha ither nicht whun a thocht cum tae tha fore, weel maybae mair nir yin thocht.? Whun wus tha last time ye sa’ ony boady haggin’ fir wae a fir hatchet ? Min ye, for them that disnae know what a fir hatchet is it’s no’ lake ony kinnae o’ common five-eichts hatchet but a big oagley baste o’ a thing, an’ tha mair A niver cud hannel yin wae ony kine o’ skill a knoad a boady wha cud. Noo a fir block wud hae stud a brav bit haggin’ an’ it tuk a boady tae know tha wye the graen rin an’ lake if he wus iver tae maak a job haggin’ fir.

Aff coorse A knoad o’ yins wha wud hae blasted tha blocks wae gelignite but A suppose it wus aa in the name o’ that hatefa wurd progress. Taakin’ aboot things o’ tha moss whaur wud ye get a guid peat spade, peat borra, ir fir a hatchet if tha notion wus tae taak ye o’ gane baak tae tha moss. A know B&Q ir oot stock at tha minnit but maybae Ebay wud bae tha best bet.

Noo, gane forrit tae tha ither thocht A had aboot rizin’ tha deil, A want tae maak it clear am naw sayin’ ye shud try this at hame. But onywye whun A wus a wean in tha last century A min yins sayin a fermin’ boady frae aroon tha North Antrim cud ‘rize tha deil’ an it wus toul that he had a big fiel o’ Arran Victor prootas ready for diggin’. Noo tha boady wha toul mae this, says he wud taakin’ tae this oul ‘deil rizer’ yin evenin’ afore bedtim’ an’ tha prootas wur aa in thur drills.

Hooiniver tha very nixt moarnin’ tha prootas wur aa dug an’ pitted, an whun yins axted tha fermer what wye this cum aboot, he toul them as boul as bress lake “tha deil an’ me dug them last nicht.” Noo A ha’rd ither things aboot sassers an ‘ bouls an taypots flyin through folks scullery an’ tha lake, an’ tha oul yins wud hae toul ye that tha ‘deil had bane riz’. Noo am naw tryin tae pit doots in yer heids, but A h’ard that in yin o’ thon cases tha flyin’ delph wus tae dae wae tha man o’ tha hoose daen a line wae a pantry maid. Tha low flyin’ sassers wur baen throod bae a wee wife wha wus far waur nir ony deil whun tha rage wus on hir.

Aff coorse naeboady taaks aboot rizin’ tha deil noo-a-dehs, but min’ ye tha wye tha wurl is A whiles think tha Deil disnae need tae bae riz for he seems tae workin’ deh an’ nicht.

Onywye thats enuech channerin’ frae me for tha minnit, is folk here in tha toon ir batterin’ awa’ wae ower ain crusade tae pit forrit oor ain wye o’ taakin’ an’ hope tae open a wee offis in tha toon shoartly. Sae keep taakin’ an’ keep scrievin’ in tha tongue yer ain Ullans tongue.


You might also like