Library

Chrisamas frae awa baak

Chrisamas frae awa baak

Ullans Speakers Association - Article 25 - December 2010
By Charlie ‘Tha Poocher’ Reynolds

Wur in tha mooth o Chrisamas agen an boys but a brev wheen o folk ir dreadin tha very thocht o it. Noo, times ir naw guid at tha minit but it cud aye bae warse. Sure wae wantin an hennin wae wull lakely get what wull dae is.

Noo, A wus thinkin lately, fur that aa’s left for ye whun ye cum tae penshun ege. Onywye, Chrisamas cum intae mae heid, an A thocht aboot the wye things hae changed since a wus leevin roon aboot Stranocum sixty year sine. Chrisamas wus aye a time whun ye wud hae had a ruchness aboot ye an yer niebors wud hae shared wae ye if ye wur shoart. A leeve in tha toon noo, an am wile ashamed tae sae thaur ir yins wha leeve naw mair nir a guid feil lenth frae mae that A cudnae tell ye thaur name. A think oor wye o leevin haes baecum far ower quick an wae hae got bit wae tha bug caa’d greed.

Awa baak in mae deys in tha country ye wud hae caa’d in wae ony o yer niebors wha wur oul ir leeved on thaur lane tae see if they wur aricht an if they needed onythin dane. That seems tae bae deein oot noo, mairs tha peety, its jest naw tha dane thing, sure ye micht bae seen as interferrin.

A mine whun tha grocery cairts wur tha only wye ye wud hae get yer tay an suggar an tha lake. Aff coorse at Chrisamas time tha cairt men wud hae gein ye a wee present for yer loyalty tae them throughoot tha year. Tha briedman wud hae gien ye a fruit loaf an a calendar, the grocery men micht hae gien ye a haf tin o biscuits ir haf a poun o tay ir whiles baith an aff coorse anither calendar. Noo these boys wud hae aye bain gien a tip alang wae tha beefman an tha milkman ir ony ither delivery boady wha caa’d wae ye. A think wae shaired mair wae oor fella man in them deys, aff coorse maebae thats jest aa in mae heid.

Noo aff coorse anither thing haes changed as weel is tha fect that a wile wheen o yins hae forgot what Chrisamas is aa aboot. Parties an presents, atin an drinkin, naw, tha birth o a wean in a stable, Jesus, dinnae forget tha main rayson o Chrisamas.

A merry Chrisamas an a guid New Year tae yin an aa.


You might also like