BBC navigation

இலங்கை : 'ஏமாற்றத்துடன் கடந்துபோகும் 2012'

கடைசியாக பிரசுரிக்கப்பட்டது: 31 டிசம்பர், 2012 - 15:42 ஜிஎம்டி
வெள்ளப்பெருக்குடன் கடந்துபோகும் 2012

வெள்ளப்பெருக்குடன் கடந்துபோகும் 2012

கடந்துபோன 2012 ஆம் ஆண்டு இலங்கையை பொறுத்தவரை பல வகைகளிலும் ஒரு ஏமாற்றம் மிக்க ஆண்டாகவே கடந்து போயிருப்பதாக இலங்கையின் மூத்த பத்திரிகையாளர்களில் ஒருவரும், சிலோன் டுடே பத்திரிகையின் மூத்த செய்தி ஆசிரியரும், இலங்கை தமிழ் ஊடகவியலாளர் ஒன்றியத்தின் தலைவருமான அனந்த் பாலகிட்ணர் கூறியுள்ளார்.

போரில் ஏற்பட்ட தோல்வியை அடுத்து இலங்கை தமிழ் மக்களைப் பொறுத்தவரை கடந்த மார்ச் மாதத்தில் நடந்த ஐநாவின் மனித உரிமைகள் ஆணைக்குழுவில் இலங்கைக்கு எதிராக வந்த தீர்மானம் ஒரு உந்து சக்தியாகப் பார்க்கப்பட்டாலும், அதனையடுத்து பெரிய அளவில் எந்தவிதமான முன்னேற்றமும் காணப்படவில்லை என்றும் அவர் கூறியுள்ளார்.

அனந்த் பாலகிட்ணர் செவ்வி

'தொடரும் பிரச்சினைகள் ஒரு அரபு வசந்தத்தை நோக்கியா?'

'இலங்கையில் நீதித்துறைக்கும் சட்டவாக்கத்துறைக்கும் இடையிலான பிரச்சினைகள் உட்பட ஏனைய தொழிற்சங்க பிரச்சினைகளும் தொடர்ந்தால் அது ஒரு அரபு வசந்தத்துக்கு இட்டுச் செல்லலாம் என்று ஆய்வாளர்கள் கூறுகிறார்கள்.'

கேட்கmp3

இவற்றை இயக்க உங்கள் உலவியில் ஜாவாஸ்கிரிப்ட் இயங்க அனுமதித்திருக்க வேண்டும் மேலும் பிளாஷ் பிளேயரின் மிகச் சமீபத்திய வடிவம் உங்கள் கணினியில் நிறுவப்பட்டிருக்க வேண்டும்.

மாற்று மீடியா வடிவில் இயக்க

அதேவேளை இலங்கையின் தென்பகுதி அரசியலைப் பொறுத்தவரை எதிர்க்கட்சிகள் பலமிழந்த நிலையில், ஒரு தனிநபர் ஆட்சியே அங்கு நடக்கிறது என்ற நிலைமையே தொடர்வதாகவும் அனந்த் குறிப்பிட்டார். இதன் தொடர்ச்சியாக நீதித்துறைக்கும், சட்டவாக்கத்துறைக்கும் இடையில் ஏற்பட்டுள்ள இழுபறி நிலை இலங்கையில் ஒரு ''அரபுவசந்தத்தை'' ஒத்த நிலையை ஏற்படுத்திவிடும் என்று அரசியல் ஆய்வாளர்கள் எச்சரித்துள்ளதாகவும் அவர் கூறினார்.

யாழ் மாணவர் போராட்டம் பெரும் பாதிப்பு

யாழ் மாணவர் போராட்டம் பெரும் பாதிப்பு

இதற்கிடையே 2012 இல் இலங்கையில் தொடர்ச்சியாக தொழிற்சங்கப் போராட்டங்கள் நடந்திருப்பதாகவும், அதில் கல்வித்துறை போராட்டம் மிகவும் முக்கியமானது என்றும் அவர் தெரிவித்தார்.

இந்தப் போராட்டங்களுக்கு இலங்கையின் பொருளாதார நிலையே அடிப்படைக் காரணம் என்றும் அனந்த் பாலகிட்ணர் கூறுகிறார்.

அதேவேளை தமது பிரச்சினைகள் அரசியல் ரீதியாக தீர்க்கப்பட வேண்டும் என்ற எதிர்பார்ப்பு தமிழ் மக்கள் மத்தியில் தொடர்வதாகவும் அவர் கூறினார்.

BBC © 2014 வெளியார் இணையதளங்களில் இருக்கும் தகவல்களுக்கு பிபிசி பொறுப்பாகாது

(CSS) ஸ்டைல் ஷீட் வசதியுள்ள இணைய உலவிகளில்தான் இந்த பக்கத்தை ஒழுங்காகப் பார்க்க முடியும். தற்போது நீங்கள் வைத்துள்ள உலவியிலேயே இப்பக்கம் தெரியும் என்றாலும், இப்பக்கத்தின் முழுமையான காட்சி அனுபவத்தை நீங்கள் பெற இயலாது. உலவியின் புதிய பதிப்பு ஒன்றைப் பெறுவது பற்றி பரிசீலிக்கவும், அல்லது உங்கள் உலவியில் ஸ்டைல் ஷீட் வசதி இருந்தால், அது செயல்பட அனுமதிக்கவும்.