Гурбонгулӣ Бердимуҳаммадов ба ҳайси раиси ҷумҳурии Туркманистон дубора савганд ёд кард
Раиси ҷумҳурии Туркманистон дар маросими таҳлиф ё адои савганди худ ваъдаи таъмини риъояти ҳуқуқи башар ва озодиҳо дар ин кишварро додааст.
Маросими таҳлифи Қурбонқулӣ Бердимуҳаммадов, ки якшанбеи гузашта барои бори дуввум дар интихоботи раёсати ҷумҳурӣ дар Туркманистон пирӯз шуд, рӯзи ҷумъаи 17 феврал аз телевизиюни давлатии "Олтин аср" (Қарни тиллоӣ) ба таври мустақим пахш шуд.
Дар ин маросим дар шаҳри Ишқобод, пойтахти кишвари нафтхези Туркманистон, беш аз се ҳазор нафар, ки бештарашон ришсафедон ва афроди оддӣ буданд, ширкат доштанд.
Оқои Бердимуҳаммадов зимни ёд кардани савганд гуфт: "Ман ба ҳайси раиси ҷумҳурии Туркманистони бетараф фаъъолияти худро дар чорчӯби Қонуни асосӣ ва қавонини Туркманистон анҷом медиҳам. Ҳуқуқи башар ва озодиҳоро эҳтиром ва ҳимоят мекунам."
Дар интихоботи раёсати ҷумҳурӣ дар рӯзи 12 феврал оқои Бердимуҳаммадов ҳафт рақиб дошт, аммо ҳамаи руқабои ӯ эълом доштанд, ки аз "сиёсати Қурбонқулӣ Бердимуҳаммадов пуштибонӣ" мекунанд.
Дар ин интихобот оқои Бердимуҳаммадов 97,14 дарсади орои умумиро ба даст овард.
Созмони Амният ва Ҳамкории Урупо аз раванди кунди ислоҳоти демукротик дар Туркманистон интиқод карда ва аз фиристодани нозирони худ ба интихоботи раёсати ҷумҳурӣ дар ин кишвар худдорӣ кардааст.
Қурбонқулӣ Бердимуҳаммадови 54-сола пас аз фавти нобаҳангоми Сафармурод Ниёзов дар моҳи декабри соли 2006 ба қудрат расид ва аз рӯзҳои аввал барои маҳви кеши шахсияти Ниёзов гомҳое бардошта буд.
Аммо ба гуфтаи коршиносон, дар солҳои ахир дар Туркманистон кеши шахсияти худи Қурбонқулӣ Бердимуҳаммадов, дандонпизишки собиқ ва раиси ҷумҳури кунунӣ, густариш ёфтааст.
