Сарбозони омрикоӣ ва нерӯҳои амниятии афғон тадобири амниятиро дар маҳалли инфиҷор иҷро мекунанд
Дар асари инфиҷори як худрави бумбгузоришуда дар шаҳри Қандаҳор дар ҷануби Афғонистон дастикам 5 маъмури пулис ва ду ғайринизомӣ кушта шудаанд.
Ин инфиҷор дар наздикии як пойгоҳи пулис дар ҷануби шаҳри Қандаҳор рӯй додааст.
Мақомоти амниятӣ мегӯянд ҳудуди 19 нафари дигар дар асари ин ҳодиса захмӣ шудаанд.
Яке аз шоҳидони айнӣ дар Қандаҳор гуфт, ки ба дунболи вуқуъи инфиҷор садои тирандозии силоҳи сабук низ "то чанд дақиқа" ба гӯш расидааст.
Гурӯҳи Толибон ба шакли суннатӣ дар Қандаҳор нуфуз дорад. Ин вилоят пойгоҳи аслии фармондеҳии Толибон дар замони ҳокимияти ин гурӯҳ бар Афғонистон буд ва пеш аз фурӯпошии Толибон дар авохири соли 2001 ин гурӯҳ камокон дар Қандаҳор ва манотиқи ҳамҷавори он ҳузур доштааст.
Ин инфиҷор дар гармогарми талошҳо барои оғози гуфтугӯҳои сулҳ бо Толибон сурат мегирад.
Толибон ибрози омодагӣ кардаанд, ки бо ҷомеъаи ҷаҳонӣ дар мавриди авзоъи Афғонистон "ба тафоҳум бирасанд" ва ҳамзамон талошҳое барои гушоиши як намояндагӣ барои Толибон дар Қатар сурат гирифтааст.
