Тасвире аз Гулшефта Фароҳонӣ дар филме, ки окодемии Сезор бар рӯйи сойти Ютюб гузоштааст
Интишори акси бараҳнае аз Гулшефта Фароҳонӣ, бозигари эронӣ, дар вебсойти маҷаллаи фаронсавии "Фигору", ва дар пайи он, интишораш дар шабакаҳои иҷтимоъӣ вокунишҳои гуногуне дар дохил ва хориҷ аз Эрон барангехтааст.
Ин акс ҷузви маҷмӯъаест аз Жон Мундину, аккоси саршиноси фаронсавӣ, ки аз 16 бозигари ҷавоне, ки номашон барои номзадии бахши беҳтарин "бозигари мустаъиди" ҷавоизи синемоии Сезор матраҳ шуда, гирифтааст.
Ҳамчунин филми кӯтоҳе аз ин бозигарон мунташир шудааст, ки онҳоро дар ҳоли урён шудан нишон медиҳад. Ин филм барои маросими Сезор сохта шудааст.
Албатта маҷаллаи "Фигору" акси хонуми Фароҳониро соъоте пеш аз ин маҷмӯъа ҳазф кард ва филми расмии он, ки дар Ютюб мунташир шуда буд, муддате дар дастрас набуд.
Вокунишҳои мусбат ва манфӣ ба интишори ин акс бисёр чашмгир будааст. Барои мисол, танҳо дар яке аз сафаҳоти ҳаводорони Гулшефта Фароҳонӣ дар Фейсбук камтар аз 24 соъат пас аз интишори он ҳазорон нафар дар бораи он назар додаанд.
Линкҳои муртабит бо ин акс дар вебсойт болотарин ва дар маҷмӯъ беш аз ҳазор имтиёз овардааст.
Дар бисёре аз ин назарот корбарон зимни дифоъ аз ин амали Гулшефта Фароҳонӣ кори ӯро шуҷоъона хондаанд ва ҳатто иддае "тобушикании" ӯро бо иқдоми Улё Моҷида Алҳамдӣ, донишҷӯйи мисрӣ, муқоиса кардаанд, ки ба манзури дифоъ аз озодии баён ва эътироз ба сонсур аксҳои бараҳнаи худро дар интернет мунташир кард.
Гулшефта Фароҳонӣ пас аз хурӯҷ аз Эрон ба фаъъолияти бозигарии худ идома дод
Дар муқобил низ мухолифон бараҳна шудани Гулшефта Фароҳонӣ дар муқобили дурбинро амале мазмум (мазамматшуда) баршумурдаанд ва онро муғойир бо арзишҳои як зан донистаанд.
Илова бар вокунишҳое, ки интишори ин акс дар байни корбарони эронии шабакаҳои иҷтимоъӣ барангехтааст, баъзе аз вебсойтҳои хабарӣ дар Эрон дар вокуниш ба интишори ин акс амали хонуми Фароҳониро маҳкум кардаанд.
Аз ҷумла, хабаргузории Форс, наздик ба усулгароён, дар матлабе бо унвони "Иқдоми вақеҳонаи ҳунарпешаи филми Асғари Фарҳодӣ" навиштааст: "Бозигаре, ки як рӯз бо бозӣ дар нақши модаре фидокор дар филми "Мими мисли модар" хуш дурахшида буд, бо паноҳ бурдан ба синемои ғарбӣ имрӯз ифтихораш ин аст, то ба ҳароҷ гузоштани наҷобаташ аксаш бар ҷилди як маҷаллаи фаронсавӣ мунташир шудааст."
Гулшефта Фароҳонӣ, ки пас аз хурӯҷ аз Эрон ба фаъъолияти бозигарии худ идома додааст, барои бозӣ дар филми фаронсавии "Мекушамат, агар бимирӣ", сохтаи Ҳунар Салим, коргардони курди муқими Фаронса, аз бахтҳои дарёфти ҷоизаи беҳтарин "бозигари мустаъиди" ҷавоизи Сезор ба шумор меравад.
Ӯ, ки дар соли 1376 дар 14-солагӣ бо филми "Дарахти гулобӣ", сохтаи Дориюши Меҳрҷӯйӣ, вориди дунёи бозигарӣ шуд, охирин бор дар филми "Дар бораи Элӣ", сохтаи Асғар Фарҳодӣ, дар Эрон муқобили дурбин рафт.
Ӯ дар соли 2008 бо бозӣ дар филми "Маҷмӯъаи дурӯғҳо", сохтаи Ридли Искот, бо бозӣ дар муқобили Леунорду ди Коприю нахустин ҳузури худро дар филме ҳоливудӣ таҷруба кард - филме, ки далели дигаре шуд, ки натавонад ба Эрон бозгардад.
Аз Гулшефта Фароҳонӣ барои бозӣ дар филми "Дар бораи Элӣ" дар чанд ҷашнвораи синемоӣ тақдир шудааст
Бозии Гулшефта Фароҳонӣ дар ин филми ҳоливудӣ далеле шуд, ки намоиши филми "Дар бораи Элӣ" дар Эрон низ бо мушкилоте рӯбарӯ шавад, ки бо васотати Ҷаводи Шамқадрӣ, муъовини синемоии ҷадиди вазорати иршод, рафъ шуд.
Муҳаммад Ҳусайни Сафори Ҳарандӣ, вазири фарҳанг ва иршоди исломии давлати аввали Маҳмуди Аҳмадинажод, дар вокуниш ба бозии Гулшефта Фароҳонӣ дар филми "Маҷмӯъаи дурӯғҳо ба таври талвеҳӣ гуфта буд, ки касе, ки қонунро зери по бигзорад, худ низ зери по гузошта мешавад.
Зоҳиран ҳассосияти мақомҳои эронӣ ба ин далел буд, ки хонуми Фароҳонӣ бидуни пӯшиши исломӣ дар ин филм ва ҳамин тур, дар ҷашнвораҳои синемоии хориҷ аз Эрон зоҳир шуда буд.
Аз ӯ барои бозӣ дар филми "Дар бораи Элӣ" дар чанд ҷашнвораи синемоии ҷаҳонӣ тақдир шудааст.
Гулшефта Фароҳонӣ дар соли 1362 дар Теҳрон мутаваллид шудааст.
Падари ӯ Беҳзод Фароҳонӣ аз бозигарони шинохташудаи синемо ва теотр аст. Хоҳари бузургтари ӯ Шақоиқ Фароҳонӣ низ бозигари синемост.
"Замона", "Бутик", "Ашки сармо", "Ба номи падар", "Мими мисли модар" ва "Хуриши мурғ" аз дигар филмҳои ӯст.
