BBC Swahili - Medianuai - Nigeria mpira wa mitaani

Ibadan, katika jimbo la Oyo nchini Nigeria, ni moja la miji mikubwa Afrika Magharibi, ikiwa na idadi ya watu wapataa karibu milioni tatu. Jiji hili limeshuhudia kuzuka kwa ghasia kabla na wakati wa uchaguzi mkuu wa mwaka 2011.

Ibadan pia ni mahala pa watu kukutana na makundi mbalimbali bila kujali dini, utamaduni au siasa, kutokana na mapenzi ya soka.

Kila asubuhi na jioni vijana wa Ibadan hujipanga na kujigawanya katika timu na kuvaa sare mbalimbali na viatu pia, na kwenda uwanjani, au mitaani, au eneo lolote la wazi 'kusakata gozi'.

Wakati mwingine timu hujigawanya kutokana na mitaa wanayoishi. wakati mwingine, umri ndio unaamua nani acheze na nani - kwa kutazama zaidi urefu wa wachezaji, na sio tarehe za kuzaliwa.

Lengo lao ni moja: Kuweza siku moja kubutia timu kubwa za soka ambazo zinalipa fedha nyingi, nyumbani au hata nje ya nchi, ili kuyafanya maisha yao na familia zao kuwa bora zaidi.

Akeeb Kareem, mwenyekiti wa kikundi cha vijana cha Sango, mjini Ibadan anasema kandanda la mitaani ni muhimu katika kuhakikisha vijana wa jiji hilo wanakuwa na shughuli ya kufanya.

Mtazamo wake ni kuwa iwapo serikali inataka kupata tena medali ya dhahabu katika soka kama ilivyokuwa miaka 15 iliyopita nchini Marekani, kinachohitajika kufanyika ni kutazama mitaa ya Nigeria ambapo vijana wanacheza kwa ari wakiwa na ndoto ya siku moja kuwa nyota wa Nigeria.