BBC navigation

Yaliyojiri baada ya mshindi kujulikana Kenya

Imebadilishwa: 9 Machi, 2013 - Saa 14:00 GMT

Wafuasi wa Uhuru Kenyatta walijitokza mapema kusherehekea ushindi wa mgombea wao Uhuru Kenyatta katika eneo bunge la Gatundu

Kenya imepata rais mpya wa nne baada ya Uhuru Kenyatta kutoka muungano wa Jubilee kutangazwa kuwa mshindi katika matokeo ya uchaguzi wa Urais yaliyotangazwa na Mwenyekiti wa Tume huru ya Uchaguzi na mipaka ya Kenya .

Kenyatta amemshinda mpinzani wa karibu Waziri Mkuu Raila Odinga kutoka Muungano wa Cord kwa kupata kura milioni sita laki moja huku Raila akipata kura milioni tano laki tatu.

Mwenyekiti wa Tume huru ya Uchaguzi na mipaka Isaka Hassan alimtangaza Uhuru Kenyatta kuwa rais mpya wa Kenya.

Matokeo yaliyotolewa na tume ya uchaguzi yalimpa Uhuru ushindi kwani alipata kura 6,173,433 huku mpinzani wake Raila Odinga akipata 5,340,546

Haya ni baadhi ya matukio ya siku kama yalivyojiri.


16:52 Rais mteule Uhuru Kenyatta atoa hotuba yake ya kwanza kwa wakenya

16:50 Naibu rais mteule wa Kenya William Ruto atoa hotuba ya shukrani kwa wafuasi wa Jubilee kufuatia ushindi wao.


16:10 Raila Odinga wa muungano wa CORD, ameelezea malalamishi kuhusu matokeo ya uchaguzi wa urais yaliyompa ushindi Uhuru Kenyatta. Odinga amesema kuwa udanganyifu ulitokea katika shughuli ya kuhesabu kura kwa kutumia mfumo wa zamani baada ya mitambo ya elektroniki kugoma hali iliyohujumu demokrasia.


15:55 Mseamaji wa Raila Odinga, Anyang' Nyong'o asema kuwa muungano wa CORD ulipinga matokeo ya mwisho ya uchaguzi wa urais na kuitaka tume ya uchaguzi kutoyatangaza lakini walipuuzwa.

15:41 Rais mteule Uhuru Kenyatta anajiandaa kuwahutubia wafuasi wake katika chuo kikuu cha Kikatoliki cha Afrika Mashariki viungani mwa mji wa Nairobi punde tu baada ya kutangazwa mshindi wa uchaguzi mkuu


15:11 Rais mteule Uhuru Kenyatta akabidhiwa cheti cha kushinda uchaguzi mkuu na mwenyekiti wa tume ya uchaguzi Isaack Hassan

14:37 Isaack asema kulingana na katiba ya nchi mshindi lazima apate nusu ya kura zilizopigwa na kwa hivyo Uhuru Kenyatta ambaye alipata kura milioni sita nukta moja ikiwa ni nusu ya kura milioni mbili zilizopigwa, na bila shaka anakuwa rais wa nne wa jamuhuri ya Kenya


14:32 Isaack amesema kuwa kama tume waliamua kutumia mbinu ya zamani kuhesabu kura kwa sababu ya matatizo waliyoyapata kutokana na mitambo yake ya kupeperusha matokeo kugoma. Lakini matokeo yalithibitishwa kwa mujibu wa fomu za hesabu ya kura

14:27 Isaac amepongeza vyombo vya habari vya Kenya kwa walivyopeperusha matangazo yote kuhusu uchaguzi wa Kenya.


14:25 Mwenyekiti wa tume ya uchaguzi Isaack Hassan awahutubia wakenya wakati akijiandaa kutangaza mshindi, wa uchaguzi

Mkuu wa tume ya uchaguzi nchini Kenya Isaack Hassan

14:23 Oswago amesema kazi yake imekuwa ngumu zaidi na hakutarajia kama ingekuwa hivyo

14:18 Afisaa mkuu mtendaji wa tume ya uchaguzi ya Kenya James Oswago amesema kuwa uchaguzi uliofanyika Kenya ulikuwa mgumu zaidi kuwahi kufanyika na ulikuwa na changamoto kubwa kuwahi kushuhidiwa Afrika


14:20 Tume ya uchaguzi yajiandaa kutangaza matyokeo ya mshindi wa uchaguzi wa urais

12:39 Lori lililokuwa limewabeba wafuasi wa Uhuru Kenyatta kutoka ngome yake ye Nyeri hususan eneo la Tetu, limeanguka, watu kumi wamejeruhiwa vibaya, mmoja amefariki na wengine zaidi ya 21 wanaendelea kupata matibabu


Wafuasi wa Uhuru Kenyatta

12:35 Maelfu ya wafuasi wa Kenyatta wakusanyika katika makao makuu yamuungano wa Jubilee, kumsubiri kiongozi wao wakati ukumbi wa Bomas ukiwa tayari kwa tangazo ya mshidni wa uchaguzi wa urais


11:32 Tume ya uchaguzi Kenya inatarajiwa wakati wowote kuanzia sasa kutangaza rasmi matokeo ya kura za urais

11:31 Mwandishi wa BBC Karen Allen kupitia twitter anasema moja ya kauli aliyoisikia leo ambayo imemfurahisha sana ni kumsikia mtu akisema kuwa wakenya ndio wameshinda uchaguzi kwa sababu wana taasisi mpya


09:51 Mjini Eldoret moja ya vitovu vya ghasia za baada ya uchaguzi mwaka 2007, leo ni uwanja wa sherehe za ushindi wa Uhuru Kenyatta. Bendera na kila aina ya mabango zinazobebwa na wafuasi wa Kenyatta ni ishara ya furaha yao. Eldoret pia ni ngome ya mgombea mwenza wa Kenyatta, William Ruto


09:23 Mwandishi wa BBC mjini Kisumu ambayo ndio ngome kuu ya Raila Odinga, Ann Mawathe anasema kuwa wafuasi wa Odinga wamenuna kwa kuwa mgombea wao ameshindwa kwenye uchaguzi lakini wanaendelea na shughuli zao kama kawaida

08:45 Mjini Nyeri moja ya ngome za Uhuru Kenyatta ni vifijo na nderemeo tupu barabarani kusherehekea ushindi wake


08:12 Mjini Nakuru mamia ya watu waliamka asubuhi na mapema kusherehekea barabarani kafuatia taarifa za mgombea wao wa urais Uhuru Kenyatta. Wameonekana wakibeba mabango na matawi kama ishara ya furaha yao

08:06 Josiah Mayaka Wa Kisii Kenya anasema kupitia Bofya facebook kuwa watu wengi Kisii wamesononeka sana ila kwa sababu limetendeka wamekubali matokeo shingo upande.

07:47 Wafuasi wa Uhuru Kenyatta wameimba wimbo wa taifa wakiwa kando ya majengo ya bunge kusherehekea ushindi wa mgombea wao


Uhuru Kenyatta na mgombea mwenza wake William Ruto

07:39 Mjini Eldoret ngome ya William Ruto mgombea mwenza wa Uhuru Kenyatta sherehe zimeanza mapema na asubuhi baada ya matokeo kudhihirika wazi kuwa Uhuru Kenyatta ndiye mshindi


07:35 Hanif Mohhamed wa Mombasa-Kenya kupitia ukurasa wa Bofya facebook naona mustakabali wa Kenya ni giza tupu, saa hii anasema anatafakari njia mubadala ya kukumbana na changa moto zitakazo wapata kama wakenya baada ya athari kuanza kuchimbuka.

07:26 Vifijo na nderemeo pamoja na milio ya honi katika barabara ya Kijabe mjini Nairobi kufuatia ushindi wa Uhuru Kenyatta


07:08Alex Mulwa kupitia ukurasa wa Bofya facebook anasema kuwa wakenya wamechagua viongozi ambao wataleta maendeleo na kuleta mabadiliko katika nchi yao. Alex ,kwa niaba ya wakenya anaomba ICC isitishe na kusimamisha kesi dhidi ya Kenyatta na mgombea mwenza wake William Ruto ili kuwapa nafasi kuongoza bila wasiwasi


06:55 Wafuasi wa Uhuru Kenyatta wameanza kujitokeza katika baadhi ya sehemu za mji mkuu Nairobi kusherehekea ushindi wake


06:46 Uhuru Kenyatta ana kura 6,173,433 wakati Raila Odinga 5,340,54. Hii inampa Uhuru ushindi wa asilimia hamsini nukta tatu ambao unahitajika chini ya katiba mpya kwa mtu kushinda uchaguzi wa rais.

06:40 Tume ya uchaguzi baadaye leo itatangaza mshindi wa uchaguzi ingawa hesabu ya kura inaonyesha Uhuru Kenyatta anaongoza kinyang'anyiro.

Taarifa zinazohusiana

BBC © 2014 Ilani: BBC haihusiki na yaliyoandikwa na tovuti za nje ya BBC.

Ukurasa huu unaonekana vyema kwa kivinjari cha kisasa kikiwa na laha mtindo (CSS).Wakati unaweza kuona yaliyomo katika ukurasa huu kwa kivinjari ulichonacho, hautaweza kufaidi kuona kila kitu vizuri. Tafadhali zingatia uwezekano wa kuboresha progaramu ya kivinjari au kuwezesha laha mtindo (CSS) endapo unaweza kufanya hivyo.