Madaxwayne Sharif iyo Ra'iisul wasaare Meles Zenawi

Wuxuu soo maray magaalada Addis Ababa, oo xarun u ah midowga Africa, iyadoo uu la kulmayna madaxda dalka Ethiopia oo uu ka mid yahay, ra'iisul wasaare Meles Zenawi. wuxuu kaloo tagay dalalka Uganda iyo Djibouti, oo uu kula kulmay madaxwaynayaasha dalalkaas.

Dhinaca kale, wadamada ku jira urur goboleedka ee IGAD, ayaa ugu baaqay golaha ammaanka ee Qaramada Midoobay in uu cunaqabatayn ku soo rogo Eritrea oo lagu eedeeyay in ay hubeyso xooggaga islaamiyiinta ee kacdoonka ka wada dalka Soomaaliya.

Warbixinta

Urur goboleedka IGAD, oo Arbacadii ku shiray magaalada Addis abeba, ayaa ka wada hadlay xaaladda Soomaaliya, iyadoo todobaadkii hore Midowga Africa shir madaxeedkii uu ku yeeshay magaalada Sirte ee dalka Libya uu ugu baaqay golaha amaanka QM in uu cunaqabatayn saaro Eritrea, lana soo rogo aagag aanay diyaaraduhu dul mari karin iyo go'doomin xagga badda ah, si looga hortago shisheeyaha galaya dalka Soomaaliya.

Haddaba isagoo sii xoojinaya ayaa wareysi ay la yeelatay wakaaladda wararka Reuter, R/wasaaraha ethiopia Meles Zenawi wuxuu sheegay in shisheeyaha ku qulqulaya Soomaaliya ay gaarayaan 2,500 oo nin oo jihaad doon shisheeye ah, oo ay ka bar bar dagaalamayaan kooxaha kacdoonka wada ee Islaamiyiinta ah.

Waxaa kale oo Zenawi uu ka hadlay nasasho dheer in uu gali doono marka uu xukunka ka dego, inkastoo uusan sheegin waqti rasmi.