Abdirahman Aynte BBCSomali.com

	Guriga ay Soomaaliya leedahay ayay dayactir la'aan heysataa

Warbixinta guriga

Su'aalahaas waxaa sanadahan is-weydiinayey dadka dariska la ah guri ay leedahay Jamhuuriyadda Soomaaliya. Gurigu wuxuu ku yaallaa xaafadda New Rochelle ee duleedka magaalada New York.

Dayactir la'aan

Daaqadaha gurigan ayaa burburay. Rinjigiina wuu kasii fuqayaa. Saqafkiina wuu daxaleystay. Caws iyo dhir kale ayaana isku dahaaray halka laga galo gurigaas.

Sanadihii siddeetameeyadii ayeey dowladdii Soomaaliya iibsatay gurigaas, iyadoo ugu tala gashay inuu ku noolaado danjiraha u fadhiya xarunta Qaramada Midoobay ee New York.

Markii ay dowladdaasi burburtay 17-sano kahor, guriga waxaa muddo deganeyd haweeney Soomaali ah oo ka tirsaneyd diblomaasiyiintii ka howl-gali jirtay xarunta QM.

Yaa ku noolaan jiray guriga?

Dariska ayaa wargeyska The New York Times u sheegay in markii ugu dambeysay ee ay arkaan qof halkaas deggan ay aheyd shan sano kahor.

Qofkaasi wuxuu ahaa Axmed Xaashi (Xasharo) oo halkaas danjire uga ahaa dowladdii Carta. Qoyskiisa ayuu gurigaas mar soo dajiyey, laakiin markii dambe wuu ka raray, markii uu gurigu noqday meel aan lagu noolaan karin, isaguna uu u waayey kharash uu guriga ku dayactiro.

Waxaa waagaas guriga dhinac ka degganaa Ciid Beddel, oo hadda ah ku xigeenka danjiraha Soomaaliya u fadhiya QM.

Muran ku saabsan lacag

Wuxuu Ciid sheegay inay lacag badan ku leeyihiin dowladda Mareykanka.

Lacagtaas waxay ka timid gurigii safaaradda u ahaa Soomaaliya oo ku yaallay Washington, kaas oo ay dowladda Mareykanku xaraashtay kaddib markii ay burburtay dowladdii Maxamed Siyaad Barre.

Dowladda Mareykanku ma diidana in gurigaasi uu hanti u ahaa dowladda Soomaaliya, ha yeeshee waxey dooneysaa inay lacagtaas celiso markii ay Soomaaliya ka dhalato dowlad ay Mareykanku rasmi ahaan u aqoonsan yihiin.

Ciid Beddel wuxuu kaloo sheegay in dowladdiisu aysan hadda kharash u heyn gurigaas dayacan ee New York ku yaalla. Isaga iyo shan qof oo kale oo ka tirsan ergada dowladda KMG ah u fadhida QM waxeey deggan yihiin guryo kiro ah.

Laakiin nasiib wanaag waxeey ka howlgalaan xafiis ay leedahay Soomaaliya oo ay dayactiraan.

Sarkaal ka tirsan ergada Mareykanka u fadhida New York ayaa wargeyska u sheegay in dowladda Soomaaliya laga doonayo ineey gurigeeda ku yaalla New York dayac-tirato, ama ay iska iibiso.

Haddii taas la waayo, dariska xaafadda New Rochelle waxay ku khasban yihiin ineey il-xumo ku eegaan guriga duugoobay, inta laga helayo dowlad Soomaaliyeed oo tabar u heysa.

Duqa magaaladaasna wuxuuba dariska mar kula kaftamay ineey mala'awalaan danjiraha Mareykanka u fadhiya QM, oo la hadlaya kuwa Africa ee guryoodu ku dayacan yihiin xaafaddaas, oo u sheegaya ineey dalalkooda xasiliyaan, guryohoodana dayactiraan.