Kati Isse BBC London

	Nathif Jaamac Aadan waa agaasimaha bangiga cusub ee Islaamiga

Ganacsiga

Bangigan cusub ee Islaamiga ah oo ay leeyihiin ganacsato ka mid ah muslimiinta ku nool waddanka Kenya, ayaa waxa uu wax weyn ka tari doonnaa hawlaha ganacsiga ee dadka Muslimiinta ee ku dhaqan Kenya.

Nathif Jaamac Aadan oo ah Agaasimaha bangigaasi, muddo badana ka soo shaqeeyay bangiyada Islaamka ee ku yaal wadamada Khaliijka, ayaa BBC uga waramay maalgashiga bangigaasi iyo ujeeddooyinka ay ka leeyihiin.

Agaasimuhu waxa uu sheegay in loo oggolaaday oo ay ku hawlgeli doonaan lacag dhan hal bilyan oo Shillinka Kenya ah, taasi oo uu sheegay in ay intooda badan heleen oo loo soo shubay hadda.

	Bangiga Islaamiga ah ee First Community Bank

Bangigan cusub oo la yiraahdo First Community Bank, ayaa Nathif Jaamac waxa uu sheegay in isagu uu lahaa fikradda bangi Islaam ah, oo sida uu sheegay ujeedadiisu ahayd in muslimiinta Kenya laga xoreeyo ribada.

Mar wax laga weydiiyay halka ay ka keenayaan lacagaha, ayaa waxaa uu Agaasimuhu sheegay in lacagaha ay yihiin kuwo xalaal ah, oo ay dhamaan dadka saamiga ku leh yihiin dad muslimiin ah.