Farxiya Cali Qaajo BBCSomali.Com

	Hub culus oo habow ah oon loo meel-dayin ayaa shicibkii reydka dilaya

Masuuliinta goobaha caafimaadku waxa ay sheegayaan in markii la isku geeyo dadka ku dhintey dagaalada Muqdisho afartii maalmood ee uu socdey ay haatan gaareen 75 qof, halka dhaawaca yaal labada isbitaaladu uu kor u dhaafey 150 qof.

Dagaalkan ooy ku dagaalamayaan Maxkamadaha Islaamiga iyo kooxda la baxdey Nabadeynta iyo La dagaalanka argagixisada ayaa in muddo ahba la saadinayey, ka dib markii labada kooxood ay horey iskugu dhaceen oo dad badani ay rumeysan yihiin in intii ay kala maqnaayeen ay isku soo hub urursanayeen.

Khasaaraha uu dagaalkan geystey ayaa intiisa badan ku foorata dad reyd ah oo xabado iyo madaafiic habow ah ay guryahoodii ku dishey.

	Tiro ma laha haweenka iyo caruurta Muqdisho ka qaxdey

Dadkii Arabacadii uu diley dagaalkan waxa ka mid ah haweeney xaamilo aheyd iyo wiil yar ooy dhashey oo la joogey oo madfac habow ah uu gurigoodii oo ku yaal agagaarka degmada Yaaqshiid ugu galey.

Hub culus oo shicibkii reydka dilaya

Waxa la xaqiijiyey in Arbacadii oo kaliya ilaa afar hub culus oo iskugu jirey hoobiye iyo madaafiic ay haleeleen agagaarka Yaaqshiid.

Dadaaladii ay wadeen duqowda iyo kooxda Dhaqaaqa bulshada reydka oo ay iskugu dayayeen iney xabad joojin ku abuuraan ayaa weli socota.

Waxa wararku sheegayaan in inkastoo aysan jirin xabad joojin rasmi ah oo lagu heshiiyey, haddana magaalada Muqdisho ay fiidnimadii Arabacadii xasilooneyd.