Maxamed Caddow-BBCSomali.Com

Hadalka Kofi Annan waxa ay u dhowdahey in mar kale uu caalamka u soo jeediyo geeska Afrika

Warbixintiisii ugu dambeysay ee uu kaga waramaya xaaladda khilaafka labada
dal oo la shaaciyay Khamiistii toddobaadkan ayaa Mr Annan uu ugu baaqay
beesha caalamka inay taageerto go'aan cusub oo Qarammada Midoobay ay ka soo saarto Khilaafkaasi.

Waxaa uu ku celiyay digniintiisii hore ee ahayd, in xasiloonida haatan
Gobolka ka jirta aan loo qaadan kareynin in colaaddu tahay mid istaagtay.

Iyadoo labada dhinacba ay muujinayaan inaysan dooneynin inay qaadaan
talaabooyin milatari, ayaa haddana ay sii wadaan inay isa sii hubeeyaan
islamarkaana sheegaan in aysan waabaneynin haddii lagu garddaroodo," ayuu
yiri Mr Annan.

Warbixintiisa oo ka kooban 13 baal ayaa Xoghayaha Guud ee Qarammada Midoobay uu ku tala bixinayaa in la dhimo ciidamada Nabad Ilaalinta ee Qarammada Midoobay ee kala dhex joogo labada dal. Ciidamadaasi ayaa tiradoodu haatan tahay 3800, waxaana Hawsha ay haayaan ay Qarammada Midoobay ku bixisaa 17 milyan oo doolar bishiiba.

15-ka xubnood ee Joogtada ah ee Golaha Ammaanka ee Qarammada Midoobay ayaa la filayaa inay kulmaan bartamaha bishan September si ay uga baaraandegaan warbixinta Mr Kofi Annan.

Ciidamada ugu horeeya ee laga saari doona dhulka u dhaxeeya Eritrea iyo
Ethiopia ayaa ah kuwa waddanka Kenya oo iyagu hawla miino saarid ah ka waday bariga xadka labada dal.

Waxaana hawshii ay hayeen la wareegi doonto shirkad si gaar ah loo leeyahay,
waxaana sidaasi la filayaa in lagu dhimo ilaa 6 milyan oo doolar oo
Qarammada Midoobay ka bixi jirtay bil walba.

Hannaanka nabadda ee labadan dal ee deriska ayaa hakad galay bishii April
2002-da ka dib markii Ethiopia ay ku gacanseyrtay go'aanka Guddiga loo
xilsaaray calaamadeynta xadka.

Baaqa Kofi Annan

Kofi Annan ayaa ugu baaqay Ethiopia inay aqbasho go'aanka guddigaasi, isagoo
Eritrea-na ku booriyay inay diyaar u noqoto wadahadal.

Waxaan filayaa ayuu yiri Mr Annan in haatan labada dhinacba ay u caddaatay
in mowqifyadooda ay ku adkeystaan, kuna celceliyaan aysan wax horumar ah
dhalineynin.

Labada dalba waxaa ay u baahanyihiin nabad iyo xasilooni si ay u abaaraan
wax ka qabashada dhibaatooyinka dhinaca horumarka iyo bani'aadminimada ah ee haysta waddamadooda" ayuu yiri Xoghayaha Guud ee Qarammada Midoobay.

Isagoo muujinaya daalka iyo qalbijabka uu hawlahiisa kala kulmay ayaa
Guddiga Loo xilsaaray Calaamadinta Xadka Eritrea iyo Ethiopia waxaa uu
sheegay in uu albaabada u xiri doono xafiisyada uu ku leeyahay labada dal
dhexdooda haddii wax horumar ah laga gaari waayo hannaanka nabadda markii lagu gaaro dabayaaqada sanadkan.

Waana talaaba horseedi kareysa in dib loogu noqdo halkii uu khilaafku ka
soo farcamay.