|
|
 |
Isniin, 10.02.2003 - 06:19 Wakhtiga London
|
Xajjkii Muslimiinta oo galay maalintii u dambeysay
Dad gaaraya laba malyuun oo Muslimiin ah ayaa sanadkan Xajjka gudanaysa |
Cabdiraxman Yabarow - Nairobi
Dad gaaraya laba malyuun oo Muslimiin ah ayaa todobaadkan iskugu tagey magaalada barakeysan ee Mecca ee waddanka Saudi Arabia, si ay u gutaan waajibaadka Xajjka.
Dhinaca Soomaaliya waxa sanadkan Xajiyey dad gaaray siddeed kun oo qof, iyadoo boqollaal kale oo Soomaali ah ay ka soo Xajiyeen wadamada dibadda ka ah Soomaaliya.
Cali Jaamac Cilmi (Cali Koos) ayaa dhambaal uu BBC-da Jiddeh uga direy Axaddii ku sheegey in Madaxweynaha Dowladda ku-meel Gaarka ah ee Soomaaliya Cabdiqasim Salaad Xasan iyo wafdi uu hogaaminayo ay iyaguna Xajjka ku tageen martiqaad ay ka heleen dowladda Sacuudiga.
Waxa Axaddii Muslimiinta adduunka daafihiisa kale duwan isakaga yimid u bilaabmay gudashada qodobkii koobaad ee waxyaabihii Xujjeyda laga doonayey oo ah DAWAAFUL QUDUUM, ka dibna ay u gudbi doonaan meesha la yiraa MUNA.
Maalinta Isniinta ah ee bisha Muslimka ee Dul-Xajja ay tahay sagaalka ayeey Muslimiinta Xajinaysa dusha uga bixi doonaan buurta Caraf, halkaas oo ay ku gudanayaan qodobka ugu muhiimsan waxayaabaha laga doonayo Xujiyada oo ah WUQUUFAL CARAFA (Joogsiga Buurta Carafa).
Culamaa'udiin Soomaaliyeed oo BBC Online Nairobi ugu waramey ayaa sheegey in maalinta sagaalka carafa ay fadliyo badan ay leeday, waxana fadaa'ilka maalintaas ka mid ah iyadoo qofka sooma maalintaasi uu helayo ajir la mid ah qofka sooma laba sanadood, sidoo kale waxa culumadu ay sheegeen in qofka sooma maalinta sagaalka Carafa uu helayo dambi dhaaf la xiriira dunuubta yar yar ee qofkaasi horey u geestey.
Saraakiisha Sucuudiga ayaa ku hanajabay in ay "gacan bir ah " ku qaban doonnaan koox kasta oo aragagixisa ah oo iskudayda in ay carqaladeyso hannaan u socodka Xajjka.
Tallaabbooyinka taxadirnimo ee sanadkan aan u qaadnay Xajjka aad ayeey u sareeyaan 
| | Wasiirka Arimaha Gudaha ee Sucuudiga, Amir Nayef |
Ciidamo gaar ah oo labisan dhar gaar ah oo ay la socdaan ilaa 3,000 oo boolis ah ayaa ku gaardinayey duleedka magaalda Mecca, sidoo kale waxa buurta Caraf agteeda la geeyey baabuurta gaashaaman iyo hub kale, dhammaan hubkaas iyo carbiskaas waxa ay ka mid yahiin diyaargarowga ay Sucuudigu ku soo bandhigayaan xoogga ay ugu talagaleen ilaalinta ammaanka Xujiyada sanadkan.
|
|
| NAGALA
SOO XIRIIR |
|
| Email:
somali@bbc.co.uk |
|
Qoraalka
Noo soo Dir:
BBC
Somali Service, 116 CB Bush House, PO Box 76, Strand, London, WC2B
4PH |
Tel:
+
44 020 7557 1631
Fax:+
44 020 7497 1374 |
|
