|
|
 |
Jimce, 11.10.2002 - 13:58 Wakhtiga London
|
Dowladda oo ka qaybgalaysa shirka Eldoret
Madaxwayne Cabdiqaasim Salaad Xassan |
Dowladda Ku meelgaarka ah ee Soomaaliya ayaa markii ugu horreysay ka hadashay shirka kooxaha Soomaalida loogu qabanayo magaalada Eldoret ee dalka Kenya, dhowr maalmood uun kadib markii ay qaar ka mid ah hoggaamiyeyaasha kooxaha Muqdisho ku dhawaaqeen in ay qaadacayaan shirkaasi.
Ra'iisal wasaaraha dowladda KMG ah, Xasan Abshir Faarax, ayaa ku dhawaaqay in ay dowladdiisu si buuxda uga qeybgelayso shirkaasi dalka Kenya loogu qabanayo kooxaha Soomaalida.
Xasan Abshir waxa uu sheegay in ay si weyn u saluugeen waxa qoondo ahaan loogu soo hagaajiyey dowladdiisa oo ah 65 xubnood, taasoo sida uu sheegayna ka fog caqli-galka iyo caddaaladda labadaba.
Xassan Abshir waxa uu sheegay in uu filayey in labo isla eg loogu kala dhigi lahaa ergooyinka dhinaca dowladda iyo kooxaha ka soo horjeeda haatanse dhinaca kale loo badiyey wixii oo dhan.
Hase yeeshee, Xasan Abshir waxa uu intaasi ku daray in maaddaama ay dowladdiisu tahay dowlad dib u heshiisiin ay ka qeybgelayaan shirka xitaa haddii la siin lahaa xubno intaasi aad uga yar maaddaama aanay doonaynin sida uu yiri in ay wax shuruud ah ku xiraan wixii xal u noqon kara ummadda Soomaaliyeed.
Xassan Abshir waxa uu sheegay in shardiga keliya ee ay dowladduusi ku xirtay shirkaasi uu ahaa in ay iyaga oo dowlad ah ka qeybgalaan shirka isla markaana aanay aqbalaynin in wax kasta laga soo billaabo meel eber ah, sidaasi darteedna wixii shardigaasi ka soo harana ay uga tanaasulayaan danaha ummadda Soomaaliyeed dartood.
Waxay ahayd saddex maalmood uun ka hor markii ay hoggaamiyeyaasha siddeed kooxood magaalada Muqdisho uga dhawaaqeen in ay qaadacayaan shirka Nairobi, hase yeeshee, waxay dadweynaha Soomaaliyeed dareemayaan in shirka Kenya uu ka duwananaan doono kuwii hore laguna heli doono dowlad Soomaaliyeed oo shaqeysa.
|
|
| NAGALA
SOO XIRIIR |
|
| Email:
somali@bbc.co.uk |
|
Qoraalka
Noo soo Dir:
BBC
Somali Service, 116 CB Bush House, PO Box 76, Strand, London, WC2B
4PH |
Tel:
+
44 020 7557 1631
Fax:+
44 020 7497 1374 |
|
